МАН-ын Хяналтын ерөнхий хороо урд шөнө хуралдаж УИХ-ын гишүүн Б.Энхбаярыг намаасаа хөөх шийдвэр гаргалаа. Хяналтын ерөнхий хорооны 21 гишүүний 13 нь хуралдаа оролцсон байна. Тэдний 11 нь УИХ-ын гишүүн Б.Энхбаярыг намаасаа хөөх нь зүйтэй гэж үзжээ.
Хоёр талд хуваагдаад буй эрх баригч МАН-ынхан нэгнийхээ эсрэг шатар нүүсээр байна. Ерөнхий сайд Г.Занданшатар УИХ-ын гишүүн Б.Энхбаярыг Хууль зүй, дотоод хэргийн сайдаар томилох шийдвэрээ танилцуулсан. Мөн энэхүү шийдвэрээ парламентад танилцуулж баталгаажуулахаар өчигдөр УИХ-д хүргүүлсэн. Засгийн газрын үйл ажиллагааны тасралтгүй, шуурхай байдлыг хангах үүднээс Засгийн газрын гишүүн, Хууль зүй, дотоод хэргийн сайдыг томилох асуудлыг 2025 оны аравдугаар сарын 2-нд УИХ-д танилцуулж, Үндсэн хуулийн Гучин есдүгээр зүйлийн 4 дэх хэсэгт заасан бүрэн эрхээ хэрэгжүүлэх нөхцөлийг бүрдүүлэхийг Ерөнхий сайд Г.Занданшатар албан бичигтээ хүсжээ.
Ерөнхий сайд Г.Занданшатар ийнхүү Б.Энхбаярыг Хууль зүй, дотоод хэргийн сайдаар томилох шийдвэрээ өнөөдөр албажуулахаар УИХ-д хандсан нь энэ. Харин нөгөө талаас сайдад нэр дэвшигч Б.Энхбаярыг УИХ-д танилцуулахаас өмнө түүнийг намаасаа хөөхийг чухалчлан Хяналтын ерөнхий хороогоо шөнө дөлөөр хуралдууллаа. Тэд ч зорилгодоо хүрч УИХ-ын гишүүн Б.Энхбаярыг зэрэг нэмэхээс нь өмнө хөөчихлөө. Одоо Ерөнхий сайд, Монголын шатрын холбооны ерөнхийлөгч Г.Занданшатарын дараагийн нүүдэл юу байх вэ?
УИХ-ын дарга Д.Амарбаясгалан Б.Энхбаярыг Хууль зүй, дотоод хэргийн сайдаар томилох шийдвэрээ парламентад танилцуулах Ерөнхий сайдын хүсэлтийг чуулганы хуралдаанаар оруулах товыг тогтоож өгөх ёстой. Ерөнхий сайд бол өнөөдөр чуулганаар оруулах хүсэлтээ илэрхийлж. Гэхдээ түүний хүслээр болох уу. УИХ-ын чуулганы хуралдааны дэгийн тухай хуулийн 103.1-т "Ерөнхий сайд Засгийн газрын гишүүнийг чөлөөлөх, огцруулах, түүнтэй холбогдуулан шинээр томилох асуудлыг УИХ-д танилцуулах тухайгаа УИХ-ын даргад мэдэгдэж товыг тогтоолгоно" хэмээн заажээ. УИХ-ын дарга өөрийг нь нүүрсний хулгайч хэмээн цоллож буй хүнийг дэмнээд дээш нь суулгах нь юу л бол.
Мөн "Намаасаа хөөгдсөн хүнийг сайдаар томилж болохгүй" гэсэн тайлбар гарах нь тодорхой. Гэвч заавал намын гишүүн хүнийг сайдаар томилно, ялангуяа эрх баригч намын гишүүнийг л сайдаар томилно гэсэн хуулийн зохицуулалт байхгүй. Салбартаа хүлээн зөвшөөрөгдсөн нам бус эрдэмтнээс эхлээд хэнийг ч сайдаар томилж болно. Харин Б.Энхбаяр гишүүнийг сайдаар томилоход саад дэндүү их байна. Энэ тохиолдолд Ерөнхий сайд Г.Занданшатарын дараагийн нүүдэл юу байх нь удахгүй тодорхой болох биз ээ.
