13 настай охин зочид буудалд амиа алдсан байдалтай олджээ. Тодруулбал, “Баянзүрх дүүргийн 21 дүгээр хорооны нутаг дэвсгэрт үйл ажиллагаа явуулдаг “Очир” төвийн зочид буудлын өрөөнд хүн нас барсан байна” гэсэн мэдээлэл цагдаагийн байгууллагад ирсэн байна. Үүний дагуу 2017 оны наймдугаар сарын 23-ны өдрийн 12.44 цагт тус дүүргийн Цагдаагийн хоёрдугаар хэлтсийн алба хаагчид шалгалтын ажиллагаа хийжээ. Шалгалтын ажиллагаа хийхэд, Баянзүрх дүүргийн 16 дугаар хороонд оршин суух 13 настай, эмэгтэй А нь ил харагдах гэмтэл шархгүй нас барсан байдалтай олдсон байна.
Одоогоор хэргийн газарт байсан 19-20 насны гурван этгээдийг холбогдуулан шалгаж байгаа бөгөөд уг этгээдүүд хэрэг болсон газар байсныг одоогоор гэрч болон бусад нотлох баримтаар тогтоожээ.
Мөн Шүүхийн шинжилгээний үндэсний хүрээлэнгээс урьдчилсан байдлаар хохирогч А нь бусдад зодуулсны улмаас биедээ хүнд гэмтэл шарх авч амь насаа алдаагүй гэсэн дүгнэлт гаргасан бөгөөд үхэлд хүргэсэн шалтгааныг тодруулахаар нарийвчилсан шинжилгээнүүдийг хийж байгаа аж.
Хэргийг Баянзүрх дүүрэг дэх цагдаагийн хоёрдугаар хэлтэст шалгаж байна.