Долоо дахь улирлын “Яг түүн шиг” шоуны хамгийн эхний дугаарын ялагч, “В” продакшны дуучин Б.Анужинтай ярилцлаа.

“Яг түүн шиг” шоуны эхний дугаарын ялагч болсонд баяр хүргэе.

-Баярлалаа.

Эхний дугаартаа залуу уран бүтээлч Young Mo’G-ийн дүрд хувирах ямар байсан бэ?

-Мэдээж амархан байгаагүй. Дуугаа Young Mo’G шиг дуулж чадах ч хөдөлгөөнөө яах вэ гэж их бодсон. Бүх дууг нь сонсоод, клипийг нь үзээд байнгын гаргадаг хөдөлгөөнийг нь судалж дуурайсан. Би 36 размерийн гутал өмсдөг ч гэсэн дүрдээ хувирахын тулд 40 размерийн гутал өмсөж, том дээлэндээ түүртэхгүйгээр үзүүлбэрээ сайн үзүүлэхийг их хичээсэн. Дуулаад эхлэхээр дүрдээ ороод явчихдаг юм билээ. (инээв)

Яг түүн шигийн оролцогчид Монгол дуучнаа дуурайхаар бол очиж уулзаад хувцас, хэрэглэлийг нь авдаг гэж сонссон. Young Mo’Gтэй уулзсан уу. Хувцсыг нь авсан уу?

-Би өөрөөс нь хувцас, хэрэглэлийг нь асуусан ч яг тухайн үед байхгүй байж таарсан. Тиймээс шоуны хувцасны зураачдын баг бүх зүйлийг маань хийсэн. Манай нэвтрүүлгийн багийнхан бүх асуудлыг зохицуулж, бүгдийг бэлэн байлгаж, “Дуугаа л адилхан дуулчихсан байхад болно” гэсэн бодлыг төрүүлдэг.

Young Mo’G-ийн дүр таарч, шоундаа бэлдэж байхдаа түрүүлнэ гэж төсөөлсөн үү?

-Түрүүлнэ гэж ёстой бодоогүй. Хамгийн эхний дугаар учраас сайн оролцож, эвээ олох нь л чухал байсан. Young Mo’G-ийн дүрд хувираад үзүүлбэрээ үзүүлснийхээ дараа, түүнийг тайзан дээрээс ийм гоё мэдрэмж авдаг юм байна гэж бодсон. Энэ шоунд амжилттай оролцох эсэх нь зөвхөн оролцогчоос бус, хэрхэн хувирахаас бас шалтгаалдаг.

Нүүр хувиргалтын багтаа хэр сэтгэл хангалуун байгаа вэ?

-Үнэхээр сэтгэл хангалуун байна. Young Mo’G болчихоод, хувцсаа өмсөөд байж байтал шоуны баг, ажилчид намайг хайгаад байсан. Намайг хэн ч таниагүй, хажуугаар өнгөрөөд л яваад байсан. (инээв) Дараа нь “Би энд байсан” гэсэн чинь “Чи байгаагүй ээ” л гээд байсан.

“Яг түүн шиг” шоунд оролцох саналыг хэрхэн хүлээж авсан бэ. Өмнө нь орж үзэх юмсан гэж бодож байсан уу?

-Хамгийн эхний улирлыг гарч байхад телевизээр үзээд, оролцох юмсан гэж бодож байсан. Харин энэ жил Боловсрол телевизийн продюсерууд, Цоомоо ах оролцох санал тавихад үнэхээр гоё байсан.

Шоуны тухай төсөөлөл, бодит байдал хэр их ялгаатай байна вэ?

-Шоуг үздэг байхдаа “Амархан ч юм уу” гэж бодож байсан. Яг оролцоод явахад их өөр байна. Шоунд нийт 300 гаруй хүн ажилладаг юм билээ. Дээрээс нь хувцас, нүүр будаг, хувиргалт гээд ажил маш их. Олон хүний хүч хөдөлмөр ордог юм байна гэдгийг, тайзан дээр өөрөөсөө өөр хүний дүрд хувирна гэдэг их хэцүү гэдгийг өөрөө оролцож байж л мэдэрлээ.

Жүжигчид тийм дүрд тогловол гоё гэж ярьдаг. Түүнтэй адил энэ шоунд тэр дуучныг дуурайх юмсан гэсэн бодол байна уу?

-Яг тийм хүнийг дуурайж үзэх юмсан гэсэн бодол алга. Харин миний “Хэзээ ч чадахгүй байх даа” гэж бодож байсан зүйл даалгавар болон гарч ирж байна. Би бүжиглэж чаддаггүй ч гэсэн шоунд бүтэн бүжиг сурах хэрэг гарч байгаа. Ер нь шоунд оролцсоноор, өөртөө итгэх итгэл минь улам нэмэгдэж байна. “Яг түүн шиг” шоу залуу уран бүтээлчдийн карьерт эерэгээр нөлөөлж, маш том боломжийг нээж өгдөг.

Шоуны дараа шинэ уран бүтээл гаргах бодол байгаа юу?

-“Яг түүн шиг” шоугаа дуусгаад шинэ уран бүтээлүүд дээрээ ажиллана гэж бодож байгаа. Өөрийнхөө бичсэн шүлгээр дуу хийнэ гэж төлөвлөж байна.

Өөрөө хэр хор шартай вэ?

-Бид хоорондоо өрсөлдөхөөс илүү “Гоё шоу үзүүлье” гэж бөөндөө ярьсан. Тайзны ард хэн, яаж ажиллаж байгааг бүгд мэдэж байгаа.

“Яг түүн шиг” шоуны оролцогчид цагийг үнэхээр гоё, хөгжилтэй өнгөрүүлдэг юм шиг санагддаг. Та нар ямар байна вэ?

-Тайзан дээр гарахаас өмнө дүрдээ хэрхэн хувирч байгаагаа хараад, инээлдээд л үнэхээр хөгжилтэй байдаг. Бид дундаас хамгийн хөгжилтэй нь Хаянаа ах. (инээв) Бие биедээ туслаад, дараа дараагийн дугаарууддаа бэлдээд явж байна.

Бусад оролцогчоосоо суралцах зүйл их байна уу?

-Ах, эгч нараасаа их суралцаж, танилын хүрээгээ тэлж байна. Ийм сайхан шоунд оролцож байгаадаа үнэхээр баяртай байна. Үзэгчдэдээ шоугаа таашаалтай үзээрэй, аливаа зүйлийг хөнгөнөөр хүлээж аваасай гэж хүсье. Баярлалаа.