Хүйтний улиралд бие организмыг вирусийн эсрэг тэмцэхэд зөв хооллолт чухал үүрэгтэй. Ялангуяа ургамлын гаралтай хүнсний бүтээгдэхүүн нь хүнд зайлшгүй шаардлагатай аминдэм болон микро элементүүдээр баялаг байдаг. Тэгвэл өдөр тутмын хоолны цэсэндээ амин дэм, фитонутриент нэмэх зорилгоор ямар бүтээгдэхүүн хэрэглэх шаардлагатайг энэ удаагийн "Амьдралд ойрхон" булангаараа хүргэж байна.
Куркума
Матча
Нунтаг бүтэцтэй ногоон цай нь маш их хэмжээний аминдэм, эрдэс бодис, антиоксидант өөртөө агуулдаг тул супер хүнсэнд тооцогддог. Судалгаанаас үзэхэд матча нь зөвхөн хоол боловсруулах системд сайн нөлөө үзүүлээд зогсохгүй дархлааны системийг дэмждэг болох нь нотлогджээ. Энэ нь бие организм дахь T-эсийн ялгарлыг нэмэгдүүлдэг галлат эпигаллокатехина хэмээх (EGCG, ЭГКГ) онцгой антиоксидантын ачаар ийм үр дүнд хүрдэг байна. Т-эс нь цусан дахь цагаан эсүүд бөгөөд өвчин үүсгэгчтэй (патоген) тэмцэж, вирус болон халдвартай тэмцэхэд дархлаанд дэмжлэг үзүүлдэг аж. Та матча нунтагийг зөвхөн уугаад зогсохгүй нарийн боов, чиа-пуддинг, амттандаа нэмж эсвэл матчатай бэлэн зууш худалдан авч болно.
Даршилсан байцаа
Энэхүү ферментжүүлсэн бүтээгдэхүүн нь пробиотик болон пребиотикийн өндөр агууламжтайгаас гадна олдоц сайтай хүнс юм. Түүнчлэн даршилсан байцаа нь марганц, эслэг, C аминдэмээр баялаг тул дархлааг идэвхжүүлэх нөлөөтэй. Өдөр тутамдаа даршилсан байцаа, улаан манжин зэрэг ферментжүүлсэн бүтээгдэхүүн идсэнээр та дархлаа болон ходоодны үйл ажиллагаагаа сайжруулах боломжтой. Ерөнхийдөө даршилсан байцааг өөрийн гараар бэлтгэж идсэн нь дээр. Учир нь дэлгүүрт худалдаалагдаж буй бүтээгдэхүүнүүд ихэвчлэн өндөр хэмд ариутгасан, давсны өндөр агууламжтай байдаг бөгөөд энэ нь ашигтай бичил биетүүд болон эрдсийг өсөж үржихэд саад болдог байна. Мөн ийм төрлийн бүтээгдэхүүн нь пробиотик чанараа алдсан байдаг.
Самар
Мэргэжилтнүүд цайрыг дархлааны тогтолцоонд сайнаар нөлөөлдөг болохыг онцолдог. Энэхүү бичил элемент нь ургамлын гаралтай бүтээгдэхүүнүүдээс салатны навч зэрэг ногоонууд, үр тариа (гурвалжин будаа, буудай, овьёос) болон самранд агуулагддаг. Самар нь цайраас гадна тархи, мэдрэлийн системийн эрүүл үйл ажиллагаанд тустай омега 3, 6, 9 тосны хүчлээр баялаг. Хулууны үр, гүнжидийн үрэнд анхаарлаа хандуулаарай. Учир нь эдгээр хүнсэнд асар их хэмжээний (100 граммд 7-8 мг) цайр агуулагддаг.
Дархлаагаа дэмжихийг хүссэн хүн бүрт хэтрүүлж идэх хэрэггүй гэдгийг зөвлөж байна. Шарсан, хайрсан, боловсруулсан, утсан, их хэмжээний давс, чихэр агуулсан бүтээгдэхүүнүүд нь дархлаанд муу нөлөө үзүүлдэг гэдэг дээр эмч нар санал нийлдэг. Тэглээ ч хэт их хэмжээний хоолыг боловсруулахын тулд маш их хэмжээний эрч хүч шаардагддаг. Тэгвэл тэр их эрч хүч нь нэг л үед бие организмыг хамгаалахад шаардагдаж болно гэдгийг үргэлж санах хэрэгтэй юм.
Болгар чинжүү
Болгар чинжүү буюу бидний хэлж заншсанаар амтат чинжүү. Яагаад ч юм зөвхөн цитрусын төрлийн жимсэнд C аминдэм хамгийн ихээр агуулагддаг гэж үздэг. Магадгүй энэ ойлголт нь ЗХУ-ын үеийн хүүхэд насны дурсамжаас эхлэлтэй ч байж мэдэх юм. Тухайн үед дэлгүүрт бараг ямар ч жимс, жимсгэнэ зарагддаггүй байсан тул мандарин, жүрж, нимбэг зэрэг нь шинэ жилийн баярын бэлгэ тэмдэг болоод зогсохгүй бүх төрлийн аминдэмийн эх үүсвэр хэмээн тооцогддог байв. Тэгвэл үнэн хэрэгтээ дархлаа дэмжигч аминдэмийн агууламжаараа амтат чинжүү дээд рекордыг эзэмшдэг (100 граммд 250 мг). Дараа нь үхрийн нүд (100 граммд 200 мг), брокколи (100 граммд 136 мг) ордог байна. Харин 100 грамм нимбэг болон мандаринд ердөө 40 болон 38 мг C аминдэм агуулагддаг. Харин хүн өдөрт дунджаар 80-90 мг C аминдэм авсан байх ёстой.