ОХУ-ын эрүүл мэндийн хяналтын байгууллага мягмар гарагт Сибирийн тахлын судалгааны хүрээлэнгийн өнгөрсөн долоо хоногт нас барсан лабораторийн ажилтантай хавьтал болсон хүмүүсийн дунд тахлын тохиолдол илрээгүй гэж мэдээлжээ. Харин нутгийн иргэд амьдралын хэвийн хэмнэлд нь бараг өөрчлөлт гараагүй гэж ярьсан байна.
Эрх баригчдын мэдээлснээр 28 настай эмэгтэй баасан гарагт шалтгаан нь бүрэн тодорхойгүй байгаа уушгины хатгалгааны улмаас нас барсан байна. Энэ хэрэг АНУ-ын Ерөнхийлөгч Дональд Трамп хүртэл анхаарал хандуулах хэмжээнд олон улсын түгшүүрийг төрүүлжээ.
Эрүүл мэндийн хяналтын байгууллага Роспотребнадзор мэдэгдэлдээ Иркутск дахь тахлын судалгааны хүрээлэнгийн ажилтнуудын дунд сүүлийн 10 хоногт ямар нэгэн халдварт өвчний тохиолдол бүртгэгдээгүй гэж мэдээлэв. Мөн өргөн хүрээний шинжилгээгээр нас барсан эмэгтэйн биед түүний ажилтай холбоотой ямар нэгэн бичил биетэн илрээгүй байна.
“Эпидемийн эсрэг цогц арга хэмжээг нэн даруй зохион байгуулж, нийтийн эрүүл мэндийн хууль тогтоомжийн дагуу бүрэн хэрэгжүүлсэн” гэж тус байгууллага мэдээлжээ.
Үүнд өвчтөнтэй хавьталд орсон байж болох хүмүүсийн хүрээг аль болох өргөнөөр тогтоож, тэднийг эмнэлэгт эмчийн хяналтад оруулахын зэрэгцээ өдөр бүр лабораторийн шинжилгээ авах арга хэмжээ багтсан байна.
Шинжилгээний дүнгээр Ковид-19-ийн хоёр, риновирусийн халдварын хоёр тохиолдол илэрсэн боловч бусад халдварт өвчин үүсгэгч эмгэг төрөгч илрээгүй гэж Роспотребнадзор мэдээлэв.
“Хавьтал болсон хүмүүсийн хэнд нь ч халдварт өвчинтэй холбоотой эрүүл мэндийн өөрчлөлт гараагүй” гэж тус байгууллага нэмж хэлжээ.
Иркутск хотын ойролцоох Шелехов дүүргийн орлогч дарга Елена Софина орон нутгийн эмнэлгийг хорио цээрт оруулсан талаар мэдээлэхдээ, “аюултай онош” батлагдаагүй гэж мэдэгдсэн.
Мөн урьдчилан сэргийлэх зорилгоор хорио цээрт оруулсан хүмүүсийн 60 хувь нь хэдийнэ гарсан гэж тэр хэлжээ. Орон нутгийн хэвлэлүүдийн мэдээлснээр ойролцоогоор 200 хүнийг хорио цээрт оруулсан байна.
