Улаанбаатар хотын төвлөрлийг бууруулах, эдийн засгийн өсөлтийг хөгжүүлэх зорилгоор Монгол Улсын их хурлын 76 дугаар тогтоолоор Хүннү хотыг байгуулах шийдвэр гарсан. Тэгвэл Хүннү хот нь өөрийн эх үүсвэрээс батарей хуримтлуулж, эрчим хүчээ хангах юм. Энэ хүрээнд уг төслийн урьдчилсан сонгон шалгаруулалтын бичиг баримтыг хүлээн авч, өчигдөр нээлээ.
2025 оны 12 дугаар сарын 26-ны өдрөөс 2026 оны нэгдүгээр сарын 5-ны өдрийн 16:00 цаг хүртэл олон нийтэд ил тод зарласан шалгаруулалтад дараах аж ахуйн нэгжүүд хүсэлт ирүүлж, холбогдох бичиг баримтаа ирүүлсэн байна.
1. “Нью Ком" ХХК,
2. “Эич Эй Си Смарт Тех" ГХОХХК,
3. "Энвижи Энэржи" ХХК,
4. "Шийриз стоун" ХХК,
5. "Хунан Индастриал Экүйпмент Инсталэйшн" ХХК
Нэг сарын дотор техник болон санхүүгийн чадавх зэрэг холбогдох үнэлгээг хийгээд, дараагийн шатны буюу уралдаант сонгон шалгаруулалтад гурав хүртэлх аж ахуйн нэгж шалгарна.
"Хүннү хотын өөрийн эх үүсвэрээс цэнэглэх 90 МВт батарей хуримтлуурын станц” төслийг төр, хувийн хэвшлийн түншлэлээр хэрэгжүүлнэ. Нийт төсөвт өртөг 83.66 сая ам.доллар байхаар урьдчилан тооцоолсон бөгөөд хөрөнгө оруулалтыг хувийн хэвшлийн түншлэгч бүрэн хариуцах юм. Төслийн хүрээнд зураг төсөл, суурилуулалт, сүлжээнд холбох, нарны дэлгэц болон батарей худалдан авах ажлууд хийгдэнэ.
