Үндэсний их баяр наадмын зохион байгуулалтай холбоотойгоор Тээврийн цагдаагийн албанаас мэдээлэл өглөө.

Энэ жил Төв цэнгэлдэх орчимд дараах есөн цэгт нийт 1580 авто машины зогсоол гаргахаар төлөвлөжээ. Тодруулбал, “Наадам” центр, “Говийн Од” компанийн зогсоол, “Эн тауэр”, “Галакси тауэр”, “Хөүм пламж”, “Имарт”, “Тара центр”, Монголын бейсболын холбооны талбай, “Жетро” супермаркет гэсэн есөн цэгт наадамчин олон машинаа байрлуулна. 

Мөн нэмэлтээр “Дүнжингарав” худалдааны төв, Үндэсний цэцэрлэгт хүрээлэн, “Мишээл экспо” дээр 4500 автомашины зогсоол бэлдсэн бөгөөд дээрх гурван цэгээс Төв цэнгэлдэх рүү иргэдэд үнэ төлбөргүйгээр автобус үйлчлэх аж.  

Харин Хүй долоо худагт 18000 тээврийн хэрэгслийн зогсоол бэлдсэн бөгөөд орох хэсгүүдэд тэмдэг тавьсан байна. Наадмын өдрүүдэд Хүй долоон худгийг зорих иргэдийн тоо нэмэгддэг учраас маршрутын бус уул, овоо, замгүй хэсгээр орох, урсгал сөрөх зэрэг эрсдэл гаргаж, алба хаагчид болон бусдад хүндрэл учруулан зохиомол түгжргэл үүсгэхгүй байхыг анхаарууллаа.

Автомашины зогсоолыг өнөөдөр 07:00 цагаас эхлэн www.enaadam.mn цахим сайтаар борлуулах аж. Тэгвэл Төв цэнгэлдэх орчмын зогсоолын зөвшөөрөл бүрэн дуусжээ. Мөн Хүй долоон худгийн улаан өнгийн М зогсоол дууссан байна. Харин цэнхэр өнгийн М зогсоолыг 21 мянган төгрөгөөр худалдаалж байгаа талаар мэдээллээ.