2025-2026 оны хичээлийн шинэ жил ирэх долоо хоногт эхэлнэ. Энэ хичээлийн жилд 65 их, дээд сургууль үйл ажиллагаа явуулах бөгөөд урьдчилсан тооцоогоор 156,790 оюутан суралцах төлөвтэй байна. Энэ жил бүх шатны боловсролын байгууллагын сургалтын төлбөр өмнөх оноосоо 10-30 хувиар өссөн байгааг холбогдох байгууллага мэдээлжээ. Төрийн өмчийн их сургуулиудын сургалтын төлбөрийн мэдээллийг нэгтгэн хүргэж байна.
ШУТИС-ийн төлбөр 15 хувиас нэмэгджээ
ШУТИС-д 2025 оны хичээлийн шинэ жил шинээр элсэн суралцах төлбөрийн ерөнхий суурь, мэргэжлийн суурь хичээлийн нэг кредитийн үнэлгээ салбар сургуулиасаа хамаараад 185 мянган төгрөгөө 190 мянгын хооронд байна. Тодруулбал, барилга архитектур, геологи, уул уурхайн, технологийн, механик инженер тээврийн, мэдээлэл, холбооны технологийн, хүнс, хөнгөн үйлдвэрлэл, дизайны, хэрэглээний шинжлэх ухааны, эрчим хүч инженерчлэлийн салбар сургуулиуд-190 мянган төгрөг, гадаад хэлний, менежментийн, нийгэм хүмүүнлэгийн салбар сургуулиуд- 185600 төгрөг байна.
Харин 2-4 дүгээр дамжааны оюутнууд дунджаар 162812 төгрөгөөр нэг кредитийг тооцож төлөх юм. Эдгээр нь өнгөрсөн хичээлийн жилийнхээс 15 хувиар нэмэгдсэн дүн аж.
АШУҮИС-ийн төлбөр 5 сая төгрөг давжээ
АШУҮИС-ийн 2025-2026 оны хичээлийн жилийн нэгдүгээр дамжааны сургалтын төлбөр нэг кредитийн 170 мянган төгрөг байна. Оюутнууд нэг жилд 31-32 кредит хичээл үзэх шаардлагатай аж. Улмаар нэг оюутны жилийн төлбөр 5 сая 270 мянгаас 5 сая 440 мянган төгрөг төлөхөөр байгаа юм. Өнгөрсөн хичээлийн жилд сургалтын төлбөр 3-4 сая төгрөг байжээ.
МУИС-ийн нэг кредитийн үнэлгээ 177.1 мянган төгрөг болж нэмэгджээ
Монгол Улсын Их Сургуулийн 2-4 курсийн нэг кредитийн төлбөр 178-205 мянган төгрөг байна. Шинээр элсэгчдийн нэг кредитийн төлбөр 177.1 мянган төгрөг болжээ. Энэ нь өнгөрсөн жилийнхээс 20 гаруй мянган төгрөгөөр нэмэгдсэн дүн юм. Жилийн өмнө Харин шинээр элсэгчдийн нэг кредитийн төлбөр 168 мянган төгрөг байсан бол мэргэжлийн суурь 168 мянган төгрөгөөс 190 мянгын хооронд байжээ.
МУБИС-ийн нэг жилийн төлбөр 3 сая 894 мянган төгрөг
2025-2026 оны хичээлийн жилд МУБИС төлбөрөө 3 сая 894 мянган төгрөг болгожээ. Харин Архангай, Баян-Өлгий салбар сургуулийн төлбөр 3450000 төгрөг. Энэ нь өнгөрсөн хичээлийн жилийнхээс мөн л өссөн дүн юм.
ХААИС-ийн нэг багц цагийн төлбөр 156-169 мянган төгрөг болжээ
ХААИС бакалаврын түвшинд суралцахад дөрвөн жилийн хугацаанд 120-оос доошгүй багц цаг судлахыг шаарддаг. Харин малын эмчийн мэргэжлээр сурах оюутнууд 148 багц цаг судалдаг байна. Нэг багц цаг нь ерөнхий суурь болон мэргэжлийн, мэргэших хичээлийн аль нь болохоос хамаарч 156-169 мянган төгрөг байна. Өнгөрсөн хичээлийн жилд энэ төлбөр 135-154 мянган төгрөг байжээ.