Өнгөрсөн долоо хоногт өрнөсөн үйл явдлыг эргэн сануулж, тоймлон хүргэж байна.
Засгийн газар "Туулын хурдны зам" төслийг зогсоох шийдвэр гаргалаа
“Туулын хурдны зам” төслийн асуудлаар иргэд, улс төрийн намууд, эрдэмтэн судлаачид Ерөнхий сайдад удаа дараа шаардлага хүргүүлээд буй. Байгаль орчин, замын түгжрэл, эдийн засгийн үр нөлөө, төслийн хөрөнгө санхүүтэй холбоотой асуудлуудаар тэдний дэвшүүлэн тавьсан үндэслэлүүдийг Монгол Улсын Засгийн газар хүндэтгэн хүлээж авах ёстой гэж Ерөнхий сайд Н.Учрал үзэж байна.
“Туулын хурдны зам” төсөлтэй холбоотой олон нийтийн төөрөгдөл, мэдээллийг нэг талд нь гаргах, үнэн зөвийг тогтоох ёстой. Иймд хууль хяналтын байгууллага хяналт шалгалт явуулж дуустал “Туулын хурдны зам” төслийг зогсоож байгааг Ерөнхий сайд мэдэгдсэн юм.
Харин хотын дарга Х.Нямбаатар хэвлэлд өгсөн ярилцлагадаа "Туулын хурдны замыг зогсоосон асуудлыг бүтэн сайн ойлгоогүй. Олон улсын арбитрын асуудал үүсэх учраас Засгийн газар албан ёсоор тогтоол баталж, шийдвэр гаргах хэрэгтэй. Тэр тогтоолыг үндэслэж гүйцэтгэгч байгууллага руу бичиг өгнө. Эдийн засаг хамтын ажиллагааны байгууллагын дагуу нээлттэй тендерт оролцоод шалгарсан аж ахуйн нэгжид хохирол учирвал хохирлоо нэхэмжлэх байх. ТЭЗҮ олон улсын жишгээр явсан уу, тендер нээлттэй ил тод явагдсан уу, төсөвт өртөг нь олон улсын жишигт нийцсэн үү гэдгийг шалгах болон улсын экспертүүд томилох ёстой. Урьдчилгаа төлбөр хуулийн дагуу өгсөн үү, мөнгө нь дансандаа бүрэн байна уу гэдгийг олон нийтэд нээлттэй гаргах ёстой. Би эхлүүлсэн. Харин ямар хүмүүс хэрхэн зогсоосон нь хожим баримт болж үлдэх ёстой" гэв.
Казахстанаас нэг сая тонн газрын тос нийлүүлнэ
Монгол Улсын Ерөнхийлөгч У.Хүрэлсүх Бүгд Найрамдах Казахстан Улсын Ерөнхийлөгч Касым-Жомарт Кемелевич Токаевын урилгаар төрийн айлчлал хийлээ. Төрийн айлчлалын хүрээнд хамтын ажиллагааны эрх зүйн үндсийг бэхжүүлэхэд чиглэсэн төрийн байгууллага болон аж ахуйн нэгж хоорондын 18 баримт бичигт гарын үсэг зурлаа.
Ерөнхийлөгч нар худалдааны эргэлтийг 500 сая ам.долларт хүргэх зорилтын хүрээнд Монголоос ноос, ноолуур, арьс, шир, мах, махан бүтээгдэхүүн, Казахстанаас жимс, жимсгэнэ, хүнсний ногоо, улаан буудай зэрэг бүтээгдэхүүний нийлүүлэлтийг нэмэгдүүлэхээр тохиролцсон. Мөн “Монгол Улс болон Евразийн эдийн засгийн холбоо хоорондын чөлөөт худалдааны түр хэлэлцээр”-ийг хэрэгжүүлэх хүрээнд хамтарсан Замын зураглал гаргахаар боллоо. Хоёр орныг холбосон автозам барьж, тээврийн дөт зам нээх нь зүйтэй гэсэн хамтын шийдэлд хүрсэн. Ирэх 6 дугаар сараас Казахстаны “Скат” авиакомпани Улаанбаатар-Астана чиглэлд шууд нислэгээ эхлэж Баян-Өлгийд Казахстаны Консулын газар байгуулахаар тохиролцсон юм. Бизнес форумын дүнд манай аж ахуйн нэгжүүд Казахстаны талтай эхний шатанд 20 гаруй сая ам.долларын үнийн дүн бүхий гэрээ, хэлцэл хийлээ.
Ерөнхийлөгч У.Хүрэлсүх Казахстан улсад хийсэн төрийн айлчлалынхаа хүрээнд Астана хотноо болж буй Экологийн асуудлаарх бүс нутгийн дээд түвшний уулзалтад оролцон Ус, Бэлчээрийн газрын менежмент, Байгальд суурилсан шийдэл гэсэн гурван санаачилга дэвшүүлжээ.
Дизель түлшний үнэ нэмэгдэнэ
Ормузын хоолойн нөхцөл байдал дэлхийн зах зээлийг савлуулж, дизель түлшний үнийг огцом өсгөж байгаа. Манай улс сарын өмнө дизель түлшийг 3200 төгрөгөөр авч байсан бол өнөөдөр 4400 төгрөгөөр авч байгаа аж. Цаашид тавдугаар сард 6400 төгрөгт хүрч магадгүй тул Засгийн газраас цаг алдалгүй арга хэмжээ авч, гаалийн татварын таван хувийг тэглэхээс эхлээд шаардлагатай алхмуудыг хэрэгжүүлж байгаа аж. Энэ хүрээнд Аж үйлдвэр, эрдэс баялгийн сайд Г.Дамдинням ОХУ-ыг зорьж тус улсын Эрчим хүчний сайд С.Е.Цивилев, “Роснефть” болон “Газфромнефть” компанийн удирдлагуудтай уулзан үүсээд байгаа нөхцөл байдлыг даван гарах чиглэлээр ярилцсаны үр дүнд зарчмын тохиролцоонд хүрчээ. ОХУ дотоодын зах зээлийн үнээрээ түлш нийлүүлэхээ илэрхийлсэн тул ирэх тавдугаар сард түлш, шатахууны үнэ өсөхгүй гэж тооцоолж байна.
Багш, ажилчдын үндсэн цалинг 50 хувиар нэмэгдүүлж, нэмэгдэл, нэмэгдэл хөлсийг үндсэн цалингаас тооцно
Хувьсах зардлын дундаж хэмжээ, түүний бүрэлдэхүүн, итгэлцүүр, журам батлах тухай Засгийн газрын тогтоол батлагдлаа. Тус тогтоолоор багш, ажилчдын үндсэн цалинг 50 хувиар нэмэгдүүлж, нэмэгдэл, нэмэгдэл хөлсийг Засгийн газраас тогтоосон үндсэн цалингаас олгохоор боллоо.
Нэг суралцагчид ногдох хувьсах зардлын дундаж хэмжээгээр тооцсон зардлыг энэ тогтоолын хавсралтаар баталсан журмын дагуу энэ оны тавдугаар сарын 01-нээс тооцож санхүүжүүлэх юм.
Авилгын хэргийн мөрөөр
Авлигатай тэмцэх газрын Мөрдөн шалгах хэлтсээс Замын-Үүд дэх Гаалийн газрын гаалийн улсын байцаагч нарыг саатууллаа. Тэдэнд холбогдох эрүүгийн 3 хэрэгт мөрдөн шалгах ажиллагаа явуулж байна. Тус газрын 40 гаруй гаалийн улсын байцаагч, гаалийн бүрдүүлэлт хийдэг 10 гаруй аж ахуйн нэгж, хувь хүнийг хамруулан нэгжлэгийн ажиллагааг зохион байгуулж, одоогийн байдлаар 3 сэжигтнийг баривчлах арга хэмжээ аваад байгаа аж.
Гаалийн газрын нэр бүхий албан тушаалтнууд болон гаалийн бүрдүүлэлт хийдэг этгээдүүд нь Эрүүгийн хуулийн 22.1, 22.4-т заасан эрх мэдэл, албан тушаалын байдлаа урвуулан ашиглаж, бусдаас их хэмжээний хахууль авсан гэмт хэргийг бүлэглэн үйлдсэн байж болзошгүй үйлдэл тогтоогджээ.
