Даваа гарагийн орой Килиан Мбаппе Лондонд болсон “Алтан бөмбөг” шагнал гардуулах ёслолд оролцож байх үеэрээ Хятадын олон нийтийн сүлжээнд дэгдсэн томоохон маргааны төвд орсон.
Тэрбээр өөрийг нь хамгийн их инээлгэдэг миймийн талаар хошигножээ. Уг миймд Мбаппегийн нүүр царайг Хятадын дарангуйлагч Мао Зэдунтай төстэй дүрийн зураг дээр давхарласан байдаг аж.
Энэ маргаан Хятадын цахим орчинд түймэр мэт хурдан тархаж, тус улсын брэндүүд Мбаппетэй хамтын ажиллагаагаа нэг нэгээр нь цуцалж эхэлжээ. Мөн Хятадын төрийн телевиз CCTV-ийн толгой компани болох Хятадын Хэвлэл мэдээллийн групп (CMG) Испанийн Ла Лигийн тоглолтуудын нэвтрүүлгийг түр зогсоосон юм. Хятадын Гадаад хэргийн яамны хэвлэлийн төлөөлөгч энэ талаар мэдэгдэхдээ “Хятадын ард түмний сэтгэлийг шархлуулсан үг, үйлдэл нийгмийн бүх салбарын хамтын эсэргүүцэлтэй зүй ёсоор тулгарна” гэжээ.
Гэвч Хятадын цахим орчинд хүмүүс яг ямар үг, үйлдлийн тухай ярьж байгаагаа ил тод тайлбарлах нь ховор байв. Тэр ч бүү хэл, тус улсад бараг ариун нандин байр суурь эзэлдэг Мао Зэдуны нэрийг ч шууд дурдахгүй байжээ.
Хятадын 1.4 тэрбум иргэнийг дэлхийн интернэтээс тусгаарладаг нарийн зохион байгуулалттай цензурын тогтолцооны улмаас олон хүн яг юу болсныг мэдэх боломжгүй байв.
“Хятадын ард түмний сэтгэлийг шархлуулсан” гэх буруутгал дангаараа л олон нийтийн уур бухимдлыг өдөөхөд хангалттай байсан бололтой. Нийгмийн сүлжээний алгоритмууд болон хатуу хяналттай цахим орчин энэ бухимдлыг улам дэвэргэжээ.
Удалгүй дэлхийн хамгийн алдартай хөлбөмбөгчдийн нэг Мбаппе өөрийн “бодлогогүй” мэдэгдэлдээ “чин сэтгэлээсээ уучлалт гуйж” байгаагаа илэрхийлсэн юм. Түүний тоглодог “Реал Мадрид” клуб болон Испанийн Ла Лиг мөн уучлалт хүсжээ. Дэлхийн хамгийн алдартай спортын нэг болох хөлбөмбөгийн хувьд Хятад улс асар том зах зээл юм. Үүний дараа Бээжин хөлбөмбөгчний уучлалт гуйсныг “нухацтай авч үзэж байгаа” гэдгээ баталсан байна. Гэхдээ Хятадын Хэвлэл мэдээллийн групп тоглолтын нэвтрүүлгээ хэзээ сэргээх талаар мэдэгдсэнгүй.
“Уучлалт гуйх нь түүний хийх ёстой хамгийн бага зүйл. Гэхдээ би түүнийг уучлахгүй. Түүнийг хориглохыг дэмжиж байна” гэж Weibo платформ дахь хамгийн их таалагдсан сэтгэгдлүүдийн нэгэнд бичжээ.
Хачирхалтай нь, олон нийтийн хүчтэй эсэргүүцэл өрнөсөн ч Хятадын цахим орчинд Мбаппе яг юу хэлснийг асуусан хүмүүс олон байжээ. Тэд хиймэл оюун ухаант чатботуудаас хариулт хайсан ч Хятадын интернэттэй адил цензуртэй эдгээр систем ямар ч тодорхой мэдээлэл өгч чадаагүй байна. Бусад нь болсон явдлыг тайлбарлахыг оролдсон ч Мао Зэдуны нэрийг дурдахаас зайлсхийжээ.
Зарим хэрэглэгч “100 юанийн дэвсгэрт дээрх хүн” болон Маогийн өөртөө хэрэглэж байсан “багш” гэх нэршлээр түүнийг төлөөлүүлэн дурдсан байна. Мөн мийм болон ярилцлагын дэлгэцийн зургийг хуваалцахдаа “дарангуйлагч” гэсэн үг болон Мбаппегийн нүүрийг бүдгэрүүлжээ.
Хятадын Гадаад хэргийн яамны мэдэгдэл болон Мбаппе, “Реал Мадрид”, Ла Лигийн гаргасан уучлалт хүссэн мэдэгдлүүдийн аль нь ч Мао Зэдуны нэрийг шууд дурдсангүй.
Хятадад ашиглах боломжгүй X болон Threads платформуудад энэ маргаанаас үүдэн бүр ч олон мийм бий болжээ. Заримд нь Мбаппегийн нүүрийг Маогийн бусад зураг дээр давхарласан бол зарим нь бүр цаашилж, түүний нүүрийг одоогийн Хятадын удирдагч Ши Жиньпиний биед байршуулсан байна.
Харин дэлхийн бусад цахим орчинд энэ маргааныг ойлгохгүй гайхсан хүмүүс олон байжээ.
“Үнэнийг хэлэхэд ойлгоход хэцүү юм. Хүмүүс удирдагчдаа шүүмжлэх эрхгүй юм шиг санагдаж байна. Тэгээд дэлхий нийтээрээ өөрсөдтэй нь адилхан бодох ёстой гэж хүлээдэг хэрэг үү? Энэ бол утгагүй зүйл” гэж “Реал Мадрид”-ын уучлалт хүссэн мэдэгдлийн доор Instagram хэрэглэгчдийн хамгийн их таалагдсан сэтгэгдлүүдийн нэгэнд бичжээ.
“Дарангуйлагчийг дарангуйлагч гэж нэрлэснийх нь төлөө яаж ингэж зүрхэлж байна вэ? Үнэхээр аймшигтай” гэж өөр нэг хэрэглэгч X платформд бичсэн байна.
