Ховд, Баян-Өлгий аймагт малын гоц халдварт шүлхий өвчин бүртгэгдэж, тархалт нэмэгдэж байгаатай холбогдуулан орон нутгийн удирдлагууд хязгаарлалтын арга хэмжээ авч эхэлжээ.
Тодруулбал, Ховд аймгийн Булган, Үенч суманд гарсан шүлхий өвчний тархалт эрчимжиж, өвчилсөн малын тоо 200 давсан байна. Цаашид халдвар тархах эрсдэл өндөр байгаа тул баруун бүсийн гурван суманд өнөөдрөөс эхлэн 14 хоногийн хугацаанд сум, баг хооронд хүн, мал болон тээврийн хэрэгслийн хөдөлгөөнийг хязгаарлахаар шийдвэрлэжээ. Мөн Ховд аймгийн Булган, Үенч суманд өндөржүүлсэн бэлэн байдал зарлаж, 13 хүний бүрэлдэхүүнтэй шуурхай штаб байгуулан ажиллаж байна. Түүнчлэн халдварын голомт бүхий бүсэд 22 эргүүл, хяналтын пост ажиллуулж байгаа аж.
Албаны мэдээлснээр, Баян-Өлгий аймагт бүртгэгдсэн Sat-1 хэв шинжийн шүлхий өвчин нь хил дамжин орж ирсэн бөгөөд Монгол Улсад өмнө нь бүртгэгдэж байгаагүй шинэ төрөлд тооцогдож байна.
Энэхүү хэв шинж нь голчлон Ойрхи Дорнод болон Төв Азийн зарим улсад тархдаг аж. Иймд Sat-1 хэв шинжийн шүлхий өвчний эсрэг вакцин одоогоор байхгүй байгаа тул халдварын тархалтыг хумих хамгийн үр дүнтэй арга нь өвчилсөн болон сэжигтэй малыг устгалд оруулах арга хэмжээ гэж мэргэжлийн байгууллагууд үзэж байна. Мал эмнэлгийн байгууллагууд малчдад халдвар хамгааллын дэглэмийг чанд мөрдөж, малын шилжилт хөдөлгөөн хийхгүй байх, өвчний шинж тэмдэг илэрсэн тохиолдолд нэн даруй холбогдох байгууллагад мэдээлэхийг анхааруулжээ.
