Нийслэл Улаанбаатар хотын иргэдийн өдөр "Хүрээ цам-Даншиг наадам 2026" арга хэмжээнд 810 харваач цэц мэргэнээ сорьж байна.
Тодруулбал, тэмцээнд эрэгтэй 501, эмэгтэй 309 харваач оролцож, хоёр өдрийн турш хана сурд 20 сум, хасаа сурд 20 сум нийт 40 сум харван, нийлбэр дүнгээрээ шилдэг 10 байрын төлөө цэц мэргэнээ сорин өрсөлдөх юм.
Энэ жилийн тэмцээн нь өмнөх жилүүдээс оролцогчдын ур чадвар, цол зэрэглэл, өрсөлдөөний чансаа үлэмж өндөр байгаагаараа онцлогтой. Тодруулбал, Монгол Улсын дархан мэргэн цолтон гурав, даяар дуурсах мэргэн гурав, даян мэргэн тав, улсын мэргэн 16, бусад улсын цолтой 44 харваач оролцож байна. Үндэсний сурын харвааны шилдгүүд нэгэн дор хуран цугларч, уламжлалт өв соёлоо өвлөн тээхийн зэрэгцээ хурц хараа, цэц мэргэнээ сорин өрсөлдөж буй нь энэ жилийн "Хүрээ Цам–Даншиг" наадмын онцлох үйл явдлуудын нэг билээ.
