Австрийн цагдаагийн байгууллага нярайн нухашный шилэн саванд хулганын хор илэрсэн хэрэгтэй холбогдуулан 39 настай сэжигтнийг баривчилснаа мэдэгдлээ. Эрх баригчид одоогоор хордсон зургаа дахь савтай бүтээгдэхүүнийг хайсаар байна.
Германы үйлдвэрлэгч энэ явдлыг мөнгө нэхсэн оролдлого гэж тодорхойлсон бөгөөд өнгөрсөн сард HiPP брэндийн нярайн нухашны “санаатайгаар хордуулсан” шилэн савыг аюулгүйгээр хураан авсан байна.
Эдгээр бохирдсон бүтээгдэхүүнүүдийг Австри, Чех, Словак улсад хэрэглэгчдэд хүрэхээс нь өмнө илрүүлэн саатуулжээ. Харин Австрид байж болзошгүй зургаа дахь савыг олоогүй байна.
Иргэдийг таг нь гэмтсэн эсвэл онгойсон, хамгаалалтын лац байхгүй, хэвийн бус үнэртэй, эсвэл савны доод хэсэгт улаан хүрээтэй цагаан наалттай бүтээгдэхүүнээс сэрэмжлэхийг анхааруулжээ.
“Өнөөдөр бид 39 настай сэжигтнийг баривчилж чадлаа” гэж зүүн нутгийн Бургенланд мужийн цагдаагийн төлөөлөгч мэдэгдсэн бөгөөд мөрдөн шалгалтад саад учруулахгүйн үүднээс дэлгэрэнгүй мэдээлэл өгөхөөс татгалзсан байна.
Үүнээс өмнө бямба гарагт Kronen Zeitung сонин уг этгээдийг Германтай хиллэдэг Зальцбург мужид баривчилсан гэж мэдээлсэн байна.
HiPP компани мөнгө нэхсэн шаардлагын талаар дэлгэрэнгүй тайлбар өгөөгүй ч Австрийн Die Presse сонин мэдээлснээр гуравдугаар сард тус компанид 2 сая еврог зургаан хоногийн дотор төлөхийг шаардсан цахим шуудан ирсэн байна. Гэвч компани уг захидалд заасан хугацаа нь өнгөрснөөс хоёр долоо хоногийн дараа анзаарсан гэжээ.
HiPP компани уг цахим шуудан байнга шалгадаггүй ерөнхий хаяг руу илгээгдсэн байсан гэж тайлбарласан байна.
