Трампын засаг захиргаа өнгөрсөн онд төрийн байгууллагын бүтцийг цомхотгож, татвар төлөгчдийн мөнгийг хэмнэх төлөвлөгөөнийхөө хүрээнд холбооны засгийн газрын ажилтнуудыг цалинтай захиргааны чөлөөнд байлгахад 9.5 тэрбум ам.доллар зарцуулсан гэж Конгрессын хяналтын байгууллагын шинэ тооцоонд дурджээ.
Засгийн газрын хариуцлагын алба (GAO)-ны тайланд дурдсанаар, энэ нь 2023 онтой харьцуулахад цалинтай чөлөөний зардал зургаа дахин нэмэгдсэн гэсэн үг юм.
Холбооны байгууллагуудын цалинтай захиргааны чөлөө ашигласан хэмжээ өнгөрсөн онд 435 хувиар өссөн байна. Үүнд тэрбумтан Илон Маскийн удирдсан Засгийн газрын үр ашгийн газар буюу DOGE-ийн санаачилсан, маргаан дагуулсан хөтөлбөр голлон нөлөөлжээ. Засаг захиргааны албаныхан уг арга хэмжээ татвар төлөгчдөд хэдэн тэрбум ам.доллар хэмнэнэ гэж мэдэгдэж байсан юм.
Ерөнхийлөгч Дональд Трампын хоёр дахь бүрэн эрхийн хугацааны голлох санал болсон уг хөтөлбөрийн хүрээнд холбооны ажилтнууд ажлаасаа гарахаар зөвшөөрсөн тохиолдолд хэдэн сарын хугацаанд ажил хийх шаардлагагүй боловч цалингаа үргэлжлүүлэн авах боломжтой байв. Ингэснээр хөтөлбөрт хамрагдахыг ажилтнуудад урамшуулал олгожээ.
Засгийн газрын хариуцлагын албаны, 144 000 гаруй ажилтан уг хөтөлбөрийн хүрээнд чөлөөлөгдөж, нийт 6.7 тэрбум ам.доллар зарцуулсан байна.
АНУ-ын Хүний нөөцийн удирдлагын газар буюу OPM холбооны ажиллах хүчийг цомхотгоход ашигласан цалинтай захиргааны чөлөөний бодит зардлыг мэдэхгүй байгааг Засгийн газрын хариуцлагын алба мэдээлжээ. Агентлагуудаас ирүүлсэн мэдээллийн хязгаарлалтаас шалтгаалан Засгийн газрын хариуцлагын албаны тооцоо хэт өндөр байж болохыг мөн тэмдэглэсэн байна.
Мөн мэдээллийн эдгээр асуудлаас шалтгаалан урт хугацааны хэмнэлтийн зорилтууд биелж байгаа эсэхийг OPM тодорхойлох боломжгүй байж магадгүй гэнэ.
OPM харин Засгийн газрын хариуцлагын албаны тайлантай санал нийлэхгүй байгаагаа илэрхийлж, тайлан нь “холбооны засгийн газрын ажиллах хүчийг 270 000 хүнээр бууруулахад гарсан нэг удаагийн 9.5 тэрбум ам.долларын зардал болон энэ бууралтын үр дүнд татвар төлөгчдөд жил бүр бий болох 40 тэрбум ам.долларын хэмнэлтийн ялгааг онцолж чадаагүй” гэж мэдэгдсэн байна.
“Хөрөнгө оруулалтын өгөөж 400 хувь байгаа нь татвар төлөгчдөд асар их ашиг юм” гэж OPM-ийн захирал Скотт Купор CNN-д өгсөн мэдэгдэлдээ хэлжээ.
OPM-ийн мэдээллээр, Трамп 2025 оны нэгдүгээр сард албан тушаалдаа орсноос хэдхэн хоногийн дараа “Fork in the Road” гэсэн гарчигтай цахим шуудангаар зарласан ажлаас хойшлуулан гарах хөтөлбөрт 140 000 орчим ажилтан хамрагджээ.
Тухайн үед үйлдвэрчний эвлэлүүд ажилтнуудад уг саналыг хүлээн авахгүй байхыг анхааруулж, засгийн газар есдүгээр сар хүртэл цалинг нь үнэхээр олгох эсэхэд эргэлзэж байгаагаа илэрхийлсэн. Мөн уг хөтөлбөрийг зогсоохоор шүүхэд хандсан боловч амжилт олоогүй юм.
Засгийн газрын хариуцлагын албаны тайланг үндэслэн Сенатын Төсвийн хорооны дэд дарга, Ардчилсан намын сенатор Пэтти Мюррей Трампын засаг захиргааг олон тооны туршлагатай холбооны ажилтныг цалинтай захиргааны чөлөөнд гаргасан гэж шүүмжилжээ.
“Үрэлгэн зардлыг танана гэж амласныхаа оронд Трамп татвар төлөгчдийн хэдэн тэрбум ам.долларыг хорт хавдрын эмчилгээний судалгаанаас эхлээд Үндэсний цэцэрлэгт хүрээлэнгүүдийг хамгаалах хүртэл дуртай ажлаа хийдэг байсан хүмүүсийг ажиллуулахгүй байлгахын тулд шууд зарцуулсан” гэж тэр мэдэгдэлдээ хэлсэн байна.
Мөн тэрээр үүнийг “засгийн газрыг дордуулах хамгийн өндөр өртөгтэй арга” гэж тодорхойлжээ.
