Өнгөрсөн долоо хоногт өрнөсөн үйл явдлыг эргэн сануулж, тоймлон хүргэж байна.
“Оюутолгой” төслийн менежментийн төлбөрийг хоёр дахин багасгах тохиролцоонд хүрэв
Аж үйлдвэр, эрдэс баялгийн сайд Г.Дамдиннямын ахалсан Ажлын хэсэг “Рио Тинто” групптэй “Оюутолгой” төслийн менежментийн төлбөрийг хоёр дахин багасгаж, төлбөрийн давхардлыг арилгах тохиролцоонд хүрчээ. Ингэснээр төлбөрийн зардал 2.2 тэрбум ам.доллароор буурч, Монгол Улсын өгөөж 1.5 тэрбум ам.доллароор нэмэгдэнэ.
Монголын талаас ажлын хэсгийг ахалж буй Аж үйлдвэр, эрдэс баялгийн сайд Г.Дамдинням хэлэлцээнд орохын өмнө "Асуудлыг шуурхай шийдвэрлэхгүй бол дараагийн хэлэлцээ байхгүй гэсэн зарчмын шаардлага тавьж байна. Хөрөнгө оруулагч талаас дөрвөн удаагийн уулзалтад Монгол Улсын Засгийн газраас надад өгсөн үүрэг даалгаврыг биелүүлэх хэмжээнд хариу өгөөгүй учир зөвшөөрөөгүй. Ерөнхий сайд асан Г.Занданшатар, Ерөнхий сайд Н.Учрал нарын байр суурь ижил. Монгол Улсын Засгийн газрын байр суурь өөрчлөгдөөгүй” хэмээсэн юм.
Оюутолгойн хувь нийлүүлэгчдийн зээлийн гэрээнд зааснаар үйлдвэрлэлийн үйл ажиллагаа эхэлснээс хойших хугацаанд гарсан үндсэн хөрөнгийн болон үйл ажиллагааны зардлын нийт дүнгийн зургаан хувиар менежментийн үйлчилгээний төлбөр төлж буй. Үүнээс гадна Оюутолгойн хувь нийлүүлэгчдийн зээлийн хүүг олон улсын жишигт нийцүүлэн бууруулах, “Онтрэ” ХХК-ийн эзэмшилд буй тусгай зөвшөөрөлтэй холбоотой асуудлыг шийдвэрлэх чиглэлд хэлэлцээр үргэлжилж байна.
Хугацаат цэргийн алба хаагч бусдад зодуулж амиа алдав
Сар бүр л цэргийн ангиудад хүний эрх зөрчигдсөн, эрсдэл үүссэн, амь нас эрсэдсэн асуудал гардаг боллоо. Хамгийн сүүлд, мягмар гарагт Баянхонгор аймаг дахь Зэвсэгт хүчний Барилгын цэргийн 339 дүгээр ангид 19 настай цэрэг бусдад зодуулж амиа алдсан хэрэг гарлаа. Бусад цэргийн ангиудад зүй бус харилцаанаас үүдэн цэргийн эрүү мултарсан, гэмтсэн, чих сэтэрсэн гэсэн асуудал ч дэгдээд буй. Цэргийн ангиудад хүний эрх зөрчигдөх, амь насаа алдах бүрд цэргийн байгууллагын удирдлага, Батлан хамгаалахын сайд хариуцлага хүлээх, албан тушаалаасаа огцрохыг олон нийтийн зүгээс шаарддаг. Гэвч хариуцлага хүлээх нь байтугай харин ч бүр асуудлыг өөрсдөөсөө холдуулах, өөр шалтгаантай хэмээн тайлбарлах оролдлого хийдэг байдал энэ удаад ч давтагдаж Баянхонгорт бусдад зодуулж амиа алдсан цэргийг “Эрүүл мэндийн шалтгаанаар амиа алдсан” гэх утгатай тайлбарыг ЗХЖШ-аас өгч байсан юм.
Баригдаагүй барилгад хүлэгдсэн амьдрал
УИХ-ын Өргөдлийн байнгын хороо орон сууцны захиалгын гэрээгээр хохирсон иргэд, хуулийн этгээдийн тайлбар, мэдээллийг сонсож, ажлын хэсэг байгууллаа. Сүүлийн гурван жилийн (2024-2026) байдлаар Эрүүгийн хуулийн 17.3 дугаар зүйлд заасан залилах гэмт хэргийн 39.665 тохиолдол бүртгэгдэн шалгагдсанаас “Орон сууцны захиалга” авч бусдыг залилсан 1167 хэргийг бүртгэж, мөрдөн шалгах ажиллагаа явуулсан байна. 2025 онд үүнээс 325 хэргийг шийдвэрлэсэн бол энэ оны эхний дөрвөн сарын байдлаар 232 хэргийг шийдвэрлэжээ. Өнөөдрийн байдлаар хэрэг бүртгэлт, мөрдөн байцаалтын 995 иргэнд 64.5 тэрбум төгрөгийн хохирол учирсан, 79 иргэн, 22 хуулийн этгээдэд холбогдох 259 хэрэг шалгагдаж байгаа ажээ. Эдгээрээс “Марч констракшн”, “Азийн зам”, “Ногоон хөгжил үндэсний нэгдэл”, “Авес гранд”, “Цоба хаус”, “Эбо даймонд” зэрэг хуулийн этгээдэд холбогдох хэргүүд нь олон хохирогчтой, хохирлын хэмжээ өндөр байна.
Захиалсан байрыг нь барихгүй, ашиглалтад оруулахгүй байгаа барилгын компаниудын асуудлыг Эрүүгийн хуулиар шийдвэрлэж, холбогдох этгээдийг 10 жилээр шийтгэдэг хуультай болох саналыг хохирогсдын зүгээс тавьж буй.
Хотын шинэ даргын сураг
Өнгөрсөн бямба гарагт Ерөнхий сайд Н.Учрал хотын дарга Х.Нямбаатарыг албан тушаалаас нь чөлөөлсөн билээ. Түүнийг стратегийн хүнсний нөөц бүрдүүлэх, хүн амыг хүнсээр хангах үүргээ гүйцэтгэлгүй махны зохиомол хомсдол үүсгэсэн хэмээн буруутгаж буй. Нийслэлийн МАН-ы хорооны хурлыг ирэх даваа гараг буюу 5 дугаар сарын 25-ны өдөр товлон хотын даргад нэр дэвшигчийг тодруулахаар болжээ. Үүний дараа мягмар гарагт НИТХ-ын ээлжит бус XII хуралдаанаар Нийслэлийн Засаг дарга бөгөөд Улаанбаатар хотын захирагчийиг томилох төлөвтэй байна.
Одоогоор МАН-ын нарийн бичгийн дарга бөгөөд Намын байгуулалтын газрын дарга, намын дэргэдэх Социал демократ Монголын залуучуудын холбооны ерөнхийлөгч Б.Пүрэвдагвыг шинэ мэрт нэр дэвшүүлнэ гэсэн мэдээлэл гараад байгаа юм.
