БНСУ-д 90 настай нэгэн эмэгтэйг хүүгийнхээ хар тамхины наймааны ашиг орлогыг угаахад тусалсан хэргээр нэг жилийн хорих ял оноосон байна.
Нэр нь олон нийтэд ил болоогүй уг эмэгтэй 2020 оны 4-р сараас 2022 оны 2-р сарын хооронд нийт 386 сая вон хүлээн авч, хүүгийнхээ заавраар тусгай данс руу есөн удаа шилжүүлсэн гэж Инчон-ийн шүүхэд мэдүүлжээ.
Түүний хүү, “Сон” гэж нэрлэгдсэн этгээд, 2020 оноос хойш Камбожид метамфетамин хууль бусаар нэвтрүүлсэн хэргээр хоригдож байгаа аж.
Шүүхийн мэдээлснээр, Сонгийн ээж 2019 онд Камбожид таван удаа очиж байсан бөгөөд хүү нь баривчлагдсаныг мэдэж байсан тул тухайн мөнгө хууль бус эх үүсвэртэй гэдгийг ойлгох боломжтой байсан гэж үзжээ.
Шүүгч Ви Ын-сүк “Түүний үйлдэл нь хууль бус орлогыг мөрдөн шалгахад хүндрэл учруулж, хар тамхины гэмт хэргийн тархалтад хувь нэмэр оруулсан тул онц ноцтой” гэж мэдэгджээ.
Шүүх ял шийдвэр гаргахдаа эмэгтэйн насыг харгалзан үзсэн бөгөөд өмнө нь хар тамхитай холбоотой ял шийтгэлгүй байсныг мөн тооцсон байна.
Өмнөд Солонгосын эрх баригчид Сон гэх этгээдийг Камбожоос шилжүүлэн авах ажиллагаа явуулж байгаа гэж мэдээлжээ.
Сонгийн охиныг мөн орлого хүлээн авсан, шилжүүлсэн хэрэгт шүүсэн ч, тухайн мөнгө хар тамхины орлого гэдгийг мэдэж байсан эсэх нь нотлогдоогүй тул цагаатгасан байна.
