АНУ-ын Нью-Мексико мужийн шүүх өчигдөр Meta Platforms компанийг тус мужид 25 тэрбум ам.долларын торгууль төлөхийг үүрэг болгожээ. Тус компани хэрэглэгчдийнхээ хувийн мэдээллийн нууцлалыг төөрөгдүүлсэн гэж тангарагтны шүүх дүгнэсэн аж. Энэхүү хэрэг нь Дональд Трампын 2016 оны Ерөнхийлөгчийн сонгуулийн кампанит ажилд оролцож байсан Их Британийн улс төрийн зөвлөх Cambridge Analytica компани Facebook-ийн олон сая хэрэглэгчийн мэдээллийг зөвшөөрөлгүйгээр олж авсан гэх дуулианаас үүдэлтэй.

Нью-Мексико мужийн захиргаа Meta компанийг тус мужийн Facebook хэрэглэгчдийн хувийн мэдээлэлд хэн нэвтрэх боломжтой талаар худал мэдээлэл өгсөн гэж буруутган шүүхэд нэхэмжлэл гаргажээ.

Шүүгч Фрэнсис Мэтью захирамждаа “Facebook-ийн олон жилийн турш үргэлжилсэн, олон нийтэд системтэйгээр түгээсэн хууль бус үйлдэл нь тус компанийн бизнесийн үндсэн үйл ажиллагаатай шууд холбоотой” хэмээн бичсэн байна.

Шүүгч Мэтью мужийн хууль тогтоомжид үндэслэн 219 тэрбум ам.доллароос дээш хэмжээний торгууль ногдуулах үндэслэлтэй гэж үзсэн ч эцсийн дүнг 25 тэрбум ам.доллар болгон бууруулжээ.

Meta компанийн хууль эрх зүйн асуудал хариуцсан захирал Си Жей Махони мэдэгдэл гаргаж, давж заалдах шатны шүүхэд ялалт байгуулна гэдэгтээ итгэлтэй байгаагаа илэрхийлсэн байна. Өмнө нь Meta компани Cambridge Analytica-гийн дуулиантай холбоотойгоор 2019 онд АНУ-ын Холбооны худалдааны комиссоос таван тэрбум ам.долларын торгууль хүлээж байжээ.

Түүнчлэн өөр зургаан муж Cambridge Analytica-тай холбоотой нэхэмжлэлүүдээ Meta компанитай 459.2 сая ам.доллароор тохиролцон шийдвэрлэсэн байна. Энэ нь Meta компанийн нийгмийн сүлжээний платформууд өсвөр үеийнхний сэтгэцийн эрүүл мэндэд сөргөөр нөлөөлсөн гэх мужуудын нэхэмжлэлүүдийг шийдвэрлэх зорилгоор наймдугаар сард байгуулсан, нийт 17.1 тэрбум ам.долларын олон мужийг хамарсан тохиролцооны нэг хэсэг байжээ.