Монголын үндэсний бөхийн холбооноос зохион байгуулж буй “Алтан цом”-ын хоёрдугаар тойргийн барилдаан өндөрлөлөө. Нийт найман багийг улсын арслан Б.Орхонбаяр тэргүүтэй “АПУ-Скайтел” баг хоёр хожилтой 35 даваагаар тэргүүлж эхэлсэн бол улсын арслан Э.Батмагнайгаар ахлуулсна “М-Си-Эс Энержи” баг 32 даваагаар, улсын арслан Р.Пүрэвдагваар ахлуулсан “Хатант интернэшнл” 27 даваагаар удаалж байна. Харин улсын аварга О.Хангайгаар ахлуулсан “Од групп”, улсын арслан Ц.Бямба-Отгоноор ахлуулсан “Хубилай хаан” багууд нэг хожил, нэг хожигдолтой удаалж байна. Одоогоор “Хамаг Монгол”, “Эв Монгол”, “Хүлэгү” багууд нэг ч хожилгүйгээр тэмцээнийг үргэлжлүүлж байна.
“Алтан цом”-ын хувийн барилдааны дүнгээр улсын арслан Э.Батмагнай 10 барилдаанаас 10 даваатай ганцаараа тэргүүлж эхэлсэн бол улсын арслан Э.Бямба-Отгон, улсын заан М.Лхагвагэрэл, улсын харцага Б.Цэдэнсодном, аймгийн арслан Д.Алтанцоож нарын бөхчүүд есөн даваа, нэг удаатай удаалж байна.
“Алтан цом” барилдааны гуравдугаар тойргийн барилдаан ирэх бямба гарагт буюу арваннэгдүгээр сарын 15-д Монгол бөхийн өргөөнд болно. Энэ өдөр “Од групп” баг “Хатант Интернэшнл”-тай, “Эв Монгол” баг “Хүлэгү” багууд барилдахаар оноолт гарсан байна.
