Дэлхийн удирдагч нэрийг нь сийлсэн гар буу болон зургаан ширхэг сумаар юу хийх вэ? НАТО-гийн удирдагчид Анкарагийн дээд хэмжээний уулзалтын дараа Туркийн Ерөнхийлөгчөөс галт зэвсэг бэлгэнд авсныхаа дараа яг ийм асуулттай тулгарчээ.
Их Британийн Ерөнхий сайд Кир Стармер Анкара хотоос буцах нислэгийнхээ үеэр энэхүү ер бусын бэлгийн талаар хамгийн түрүүнд ам нээсэн. Түүний хэлснээр, уулзалтад оролцсон удирдагчид бүгд нэрийг нь сийлсэн гар буу бэлгэнд авчээ.
Хар дотортой улаан хайрцагт байрлуулсан гар бууны хамт зургаан ширхэг байлдааны галт сум болон уг зэвсгийг экспортын хяналтаас чөлөөлөх тухай бичиг байсан аж. Энэ нь холбооны гишүүн орнуудын төлөөлөгчдийн аюулгүй байдлын албаныхныг ихэд сандаргасан байна.
Унгарын Ерөнхий сайд Петер Мадьяр өөрийн X хуудсандаа "Ерөнхийлөгч Эрдоганоос НАТО-гийн дээд хэмжээний уулзалтын үеэр өгсөн ер бусын бэлэг. Миний нэрийг сийлсэн Magnum гар буу, сумын хамт" хэмээн бичжээ.
Бельгийн Ерөнхий сайд Барт Де Вевер Бельгид газардсаныхаа дараа л бэлгийн жинхэнэ утга учрыг мэдсэн байна. Албаны хүний мэдээлснээр, Ерөнхий сайд маш их гайхаж, холбогдох журмын дагуу аюулгүй сейфэнд хадгалуулахаар уг бууг нисэх онгоцны буудлын цагдаад нэн даруй хүлээлгэж өгчээ.
Де Веверийн аюулгүй байдлын баг Брюссельд байрладаг ЕХ-ны удирдагчид болох Урсула фон дер Ляйен, Антонио Кошта нарт өгсөн буунуудыг мөн хүлээн авч, аюулгүй байдлыг нь хангах шаардлагатай болсон байна. Фон дер Ляйений хэвлэлийн төлөөлөгч хэлэхдээ, тэрээр Эрдоганд талархаж байгаагаа илэрхийлсэн бөгөөд уг зэвсгийг цэргийн музейд хандивлана гэв.
Польшийн Ерөнхийлөгч Кароль Навроцкийд өгсөн гар буу мөн аюулгүй хүрсэн ч шаардлагатай урьдчилан сэргийлэх арга хэмжээг авчээ. Учир нь 2022 оны 12 дугаар сард Польшийн цагдаагийн дарга Украины захирагчаас бэлгэнд авсан танк эсэргүүцэгч гранатомётоо ажлын өрөөндөө санамсаргүй дэлбэлж байсан түүхтэй. Энэ удаад Навроцкийн туслах орон нутгийн радиод "Үүгээр хэн ч буудахгүй нь тодорхой" гэж хэлжээ.
Стармер, Германы канцлер Фридрих Мерц, Нидерландын Ерөнхий сайд Роб Йеттен нарын гар буу одоогоор Туркийн нийслэлд үлдсэн байна. Хүчин төгөлдөр мөрдөгдөж буй хууль тогтоомжоос шалтгаалан галт зэвсэг, ялангуяа бүрэн ажиллагаатай зэвсгийг тээвэрлэх нь тийм ч хялбар биш юм.
Канадын Ерөнхий сайд Марк Карни гар буугаа авч явсан ч сумыг нь Туркт үлдээсэн бол Шведийн Ерөнхий сайд Ульф Кристерссоны баг "Уг зэвсгийг холбогдох бүх журмын дагуу Шведийн нутаг дэвсгэрт тээвэрлэн авчирна" гэж мэдэгдэв.
Тээвэрлэлтийн хүндрэлээс гадна энэхүү бэлэг нь Украин, Иран болон АНУ-ын Ерөнхийлөгч Дональд Трамптай хийх харилцаанд анхаарлаа хандуулж байсан дээд хэмжээний уулзалтын хэд хэдэн төлөөлөгчдийг гайхшруулав.
"Яагаад ийм бэлэг өгөв?" гэдэг асуулт дахин дахин тавигдаж байна. Төрийн тэргүүнүүд уулзалтын үеэр бэлэг солилцох нь элбэг ч ийм төрлийн урьдчилан сэргийлэх арга хэмжээ шаардсан бэлэг хүлээлцэх нь маш ховор юм. Туркийн Ерөнхийлөгчийн тамгын газар одоогоор үүнд ямар нэгэн тайлбар өгөөгүй байна.
