УИХ дахь Ардчилсан намын бүлгийн дарга, УИХ-ын гишүүн О.Цогтгэрэл намын даргад өрсөлдөх хүсэлтээ албан ёсоор өглөө. Тэрбээр хүсэлтээ өгснийхөө дараа мэдээлэл хийж, байр сууриа илэрхийллээ.

Тэрээр, "Монголоо шинээр харна. АН-ыг шинэчлэх ёстой. Манай улсын улс төр, эдийн засаг, хууль эрх зүйд олон асуудал хуримтлагдсан. Үүний шинэчлэлийн АН хийнэ гэдэгт би эргэлздэггүй. Асуудлаа эрэмбэлбэл би хамгийн чухал нь ядуурал гэнэ. Хүн амын 60-70 хувь нь ядуу байгаа улсад эрүүл, мэнд боловсролын асуудал орхигдоно. 

АН ялсан шиг ялж, засагласан шиг засаглах нийгэм, эдийн засаг, улс төрийн хэрэгцээ байна. 

АН өнгөрсөн хугацаанд яагаад ялж чадаагүйд олон шалтгаантай. Үүний гол шалтгаан нь улс төрийн системээ болж чадаагүй. Өөрөөр хэлбэл, тугаа болгосон, үзэл санаа бий ч систем болж чадаагүй. Машинаар бол эрээвэр хураавар, баруун дугуй нь том, зүүн дугуй нь жижиг байна. Энэ бүхнийг өөрчлөн, өнгө төрхөө тодотгоно. Шинэчлэгдсэн АН шинэ Монголыг цугтаа өөрчилнө гэдэгт эргэлзэхгүй байна" гэлээ.