Хиймэл оюун ухааны OpenAI компани анхдагч зах зээлд хувьцаа гаргах (IPO) хугацаагаа ирэх жил хүртэл хойшлуулахаар төлөвлөж буйг The New York Times сонин гурван эх сурвалжаас эш татан мэдээллээ.

Өмнө нь тус компанийг энэ оны намар биржид гарна гэж таамаглаж байсан юм. Шинжээчдийн үзэж байгаагаар OpenAI хувьцаагаа байршуулах үед зах зээлийн үнэлгээ нь ойролцоогоор 1 их наяд ам.долларт хүрнэ гэж тооцоолж байна.

The New York Times сонины эх сурвалжуудын мэдээлснээр, компанийн зөвлөхүүд хэрэв 1 их наяд ам.долларын үнэлгээнд хүрэхийг хүсэж байвал ирэх жил хүртэл хүлээхийг зөвлөсөн байна. Хэрэв энэ үнэлгээг бууруулбал хувьцаа гаргах үйл явцыг түргэсгэх боломжтой гэж зөвлөхүүд үзэж байгаа аж.

Үүнээс өмнө The Information хэвлэл мөн эх сурвалжуудаас эш татан, OpenAI-ийн тэргүүн Сэм Алтман IPO-г 2027 онд хийх хүсэлтэй байгаа талаар мэдээлж байсан юм.

Мөн энэ намар хиймэл оюун ухааны өөр нэгэн стартап болох Anthropic компани биржид гарч магадгүй гэсэн хүлээлт байна. Тэд OpenAI-ийн адилаар анхдагч хувьцаагаа гаргах урьдчилсан мэдүүлгээ хэдийнэ өгөөд байгаа юм.

Сүүлийн хөрөнгө оруулалтын дараа Anthropic компанийн зах зээлийн үнэлгээ 965 тэрбум ам.доллароор, харин OpenAI 852 тэрбум ам.долларт хүрчээ.