Бүх шатны боловсролын байгууллагын хичээлийн шинэ жил эхэлсэнтэй холбогдуулан Хүний эрхийн Үндэсний Комисс (ХЭҮК)-оос хүүхдийн эрх, тэр дундаа сурч боловсрох эрхийн асуудлаар өнөөдөр мэдээлэл хийлээ.
Гомдол, хяналт шалгалтын хэлтсийн дарга Г.Ууганбаатар "Сүүлийн жилүүдэд хүүхдийн хамран сургах тойрогтой холбоотой гомдол, мэдээлэл их ирдэг болсон. Хамран сургах тойргийг тогтоохдоо эцэг, эхийн хөрөнгө чинээ, өөрийн нэр дээрх үл хөдлөх хөрөнгийн гэрчилгээ зэрэг баримт бичгийг шаардаж байгаа нь хүүхдийг ялгаварлан гадуурхалтад өртөх эрсдэлд оруулж байна. Үүнээс үүдэн түр оршин суух хаягийн бүртгэлтэй гэх шалтгаанаар сургуульд нь бүртгэхгүй байх, хүүхэд сургууль завсардах нөхцөлд хүргэж байна. Тиймээс төрийн байгууллагууд хүүхдийн эрх ашгийг зөрчихгүй байх шаардлагатай. Өнгөрсөн хугацаанд ХЭҮК ирсэн гомдлын дагуу холбогдох арга хэмжээг шуурхай авч, сургалтын байгууллагад хамруулан ажилласан.
Дараагийн асуудал нь, сургалтын байгууллагын үйл ажиллагаа эхлэхтэй холбогдуулан хүний хувийн эмзэг мэдээллийг олон нийтийн сүлжээ болон бусад орчинд нээлттэй байршуулсан зөрчлүүд гарч байна. Энэ нь хүүхдийн аюулгүй байдал, эрүүл, аюулгүй орчинд өсөж торних эрхийг зөрчиж, гэмт хэрэг, зөрчлийн хохирогч болох эрсдэлийг нэмэгдүүлж байна. Түүнчлэн үе тэнгийн дээрэлхэлт, багш, ажилтнуудын зүй бус харьцаа, ялгаварлан гадуурхалттай холбоотой гомдол, мэдээлэл ирдэг.
Нийслэлийн дахин төлөвлөлтөд орсон болон алслагдсан байршлын сургуулиудын даац хэтэрснээс нэг ангид 60-70 сурагч хамрагдах тохиолдол гардаг. Мөн хувийн хэвшлийн аж ахуйн нэгжийн байрыг түрээслэх, танхимын тоног төхөөрөмж хүрэлцээгүйн улмаас нэг дүгээр ангийн зургаан настай хүүхдүүд ахуйн зориулалтын хуванцар сандал дээр хэдэн цагаар сууж хичээллэх зэрэг ноцтой нөхцөл байдал үүссэн байна. Төрийн байгууллагуудад хүн амын бүртгэл, төрөлтийн тоон мэдээлэл бэлэн байгаа. Тиймээс 2026-2027 оны хичээлийн жилд хамран сургах тойрогт хэчнээн хүүхэд элсэхийг урьдчилан тооцож, анги танхимын бэлтгэлийг салбар хоорондын уялдаатай төлөвлөх шаардлагатай" гэв.
