Улсын Их Хурлын Эдийн засгийн байнгын хорооны хуралдаанаар "Нэр дэвшигчийн сонсголын тов тогтоох, сонсгол даргалагчийг сонгох тухай” тогтоолын төслийг хэлэлцэн батлав. Монголбанкны ерөнхийлөгчид нэр дэвшигчтэй хийх нэр дэвшигчийн сонсголыг 2025 оны 12 дугаар сарын 16-ны өдөр зохион байгуулах бол нэр дэвшигчээс асуух асуулт, саналыг 2025 оны 12 дугаар сарын 12-ны өдрийг хүртэл хүлээн авахаар болжээ. Тус сонсголын даргалагчаар Улсын Их Хурлын гишүүн Д.Үүрийнтуяаг томиллоо.
Монголбанкны ерөнхийлөгчийн албан тушаалд УИХ-ын дарга нэр дэвшүүлэн парламентаар хэлэлцүүлж, зургаан жилийн хугацаагаар томилдог. Төв банкны ерөнхийлөгч Б.Лхагвасүрэнгийн бүрэн эрхийн хугацаа энэ сарын 27-нд дуусна. Үүнтэй холбогдуулан УИХ-ын дарга Н.Учрал Монголбанкны ерөнхийлөгчид "Эрдэнэс Монгол" компанийн захирал С.Наранцогтыг нэр дэвшүүлээд байгаа юм.
