Хамас бүлэглэл Газын зурвасыг 20 жил удирдсаны эцэст засаглах эрх мэдлээ шилжүүлэх бодолтой байгаагаа зарлаж, Палестины нутаг дэвсгэрийн удирдлагыг хүлээн авахыг АНУ-ын дэмжлэгтэй түр захиргаанд уриаллаа.
Даваа гарагт гаргасан уг мэдэгдэл нь Газын зурваст хэсэгчлэн хэрэгжиж буй гал зогсоох хэлэлцээрийг бэхжүүлэх эсвэл хүмүүнлэгийн гүн хямралд нэрвэгдээд буй эрүүл хаягийн нөхцөл байдлыг сайжруулахад хэрхэн нөлөөлөх нь тодорхойгүй байна.
Хамас засаглалаа шилжүүлэхэд бэлэн байгаагаа мэдэгдсэн ч Израил болон АНУ-ын шаардсаны дагуу зэвсгээ хураалгах амлалт өгөөгүй юм. Мөн засаглалыг хүлээн авах ёстой Газын зурвасыг удирдах үндэсний хороог Израил улс нэгдүгээр сараас хойш уг нутаг дэвсгэрт нэвтрүүлэхгүй хаасаар ирсэн.
Ажиглагчдын үзэж байгаагаар Хамасын энэхүү алхам нь энхийн үйл явцыг сэргээх гэсэн бэлгэдлийн чанартай оролдлого аж. Мөн Газын 60 орчим хувьд "Хүмүүнлэгийн хотхон" эсвэл "Шинэ Рафах" нэрээр палестинчуудыг тусгаарлах гэсэн Израилийн төлөвлөгөөний эсрэг хийж буй үйлдэл юм. Үүнийг Израилийн ерөнхий сайд асан Эхуд Ольмерт "бөөнөөр хорих лагерь" хэмээн нэрлэж байжээ.
Хамасын захиргааны тэргүүн Мухаммед аль-Фарра үүрэгт ажлаасаа огцорч байгаагаа зарлаж, Газын зурвасыг удирдах үндэсний хороог ирэх хүртэл төрийн албан хаагчид ажлаа мэргэжлийн түвшинд үргэлжлүүлэн гүйцэтгэнэ гэдгийг мэдэгдэв.
Газын зурвасыг удирдах үндэсний хороог Дональд Трампын засаг захиргааны зуучилсан гал зогсоох төлөвлөгөөний дагуу байгуулагдсан Энхийн зөвлөл удирддаг. Одоогоор тус зөвлөлийн 13 гишүүн Каирт саатаад байгаа бөгөөд Израилийн Беньямин Нетаньяхугийн засгийн газар тэднийг Газа руу нэвтрүүлэхгүй байгаа юм.
