УИХ-ын чуулганы нэгдсэн хуралдаанаар Засгийн газраас өргөн мэдүүлсэн Хувь хүний орлогын албан татварын тухай хуульд нэмэлт, өөрчлөлт оруулах тухай хуулийн төслийг хэлэлцлээ. Энэ үеэр УИХ-ын гишүүн С.Цэнгүүн "Зарим гишүүн хувь хүний орлогын албан татвар манай улсад өндөр биш, тийм учраас үүнийг багасгаад байх хэрэггүй гэж яриад байх юм. Нөгөө талдаа манай улсын авлигал ямар байгаа билээ. Хувь хүний орлогын албан татвараас бүрдүүлсэн төсвөө манай улс яаж зарцуулдаг билээ. Авлигын индексээр манай улс 182 улсаас 124 т жагсаж байгаа. Жил бүр хоёр байраар ухарч байгаа. Иргэд бидний дундаа хэрэглэдэг нийтийн тээвэр, эрчим хүч, боловсрол гэх мэт асуудлаа шийдээрэй гээд татвараа төлж байхад тэр асуудлууд нь гамшгийн хэмжээнд, хүртээмжтэй биш. Ийм байж "Олон улсын жишигт нийцсэн татвар төлөх ёстой" гэхээр иргэд цөхрөөд байгаа юм. Төр үүрэгт ажлуудаа хийж чадахгүй байж иргэдээс олон улсын жишигт нийцсэн татвар аваад байгаа чинь шударга бус байдал үүсгээд байна.
Амьдралаа авч яваа хичээл зүтгэл гаргаж байгаа иргэдээ дэмжих бодлого алга. Ажиллах насны залуу гэр бүлүүд Монгол Улсад амьдрах бололцоо алга, хөдөлмөр үнэлэхгүй байна, ирээдүй гэрэлгүй байна гээд хөдөлмөр үнэлдэг улсууд руу яваад байна. Бүр дунд сургуулиа төгсөж байгаа хүүхдүүд яаж гадагшаа явах вэ гэж боддог болсон байна.
Хувь хүний орлогын албан татварыг нэг хувь болгочихоор төсөв тасарна гэж яриад байна. Манай улсын төсөв 36 их наядтай. Хэрэгцээгүй маш олон зүйлс дээр үргүй зардал гаргадаг. Зүгээр байгаа бордюр сольдог. Ямар ч үр дүн гардаггүй хэлэлцүүлгийг хэдэн зуун саяар нь хэдэн удаа улс тойроод хийдэг. Энэ зардлаа та нар татчих л даа. Дундаж давхаргаа нэмэх, өмчтэй болгох боломж бүрдүүлэх үүднээс хүн амын орлогын албан татварыг нэг хувь болгоод үзье. Тэгэхэд маш том өөрчлөлт гарна. Бид залуу хүн амтай улс. Хөдөлмөрлөж байгаа хүмүүсээ дэмжээд өгөх хэрэгтэй" гэв.
