Эрх баригч МАН-ын дотоод зөрчил, Их хурлын дараах албан тушаалтын дахин хуваарилалт зэргээс шалтгаалан сүүлийн өдрүүдэд Ерөнхийлөгчийн Тамгын газар, УИХ, Засгийн газрын түвшинд олон томилгоо хийгдэж байна. Ямар албан тушаалд хэн хэн очиж байгааг танилцуулъя.
Ерөнхийлөгчийн Тамгын газар
Ерөнхийлөгчийн Тамгын газрын дарга Г.Занданшатар өнгөрсөн зургаадугаар сард Ерөнхий сайдаар томилогдсонтой холбогдуулан Ерөнхийлөгчийн захирамжаар А.Үйлстөгөлдөрийг Ерөнхийлөгчийн Тамгын газрын даргаар томилсон. Тэрээр өмнө нь Ерөнхийлөгчийн Тамгын газрын дэд даргаар ажиллаж байсан юм. Өнгөрсөн зургаадугаар сараас эзэнгүй байсан Ерөнхийлөгчийн Тамгын газрын дэд даргын албан тушаалд Барилга, хот байгуулалтын дэд сайд асан Э.Золбоог томилохоор болжээ. Тэрээр УИХ-ын гишүүн асан, Монгол Улсаас ОХУ-д суугаа Элчин сайд Ө.Энхтүвшингийн хүү юм.
Мөн Ерөнхийлөгчийн Байгаль орчин, ногоон хөгжлийн бодлогын зөвлөхөөр НИТХ-ын төлөөлөгч асан Д.Ихбаярыг томилох тухай мэдээлэл гарч эхэллээ.
Түүнчлэн Ерөнхийлөгчийн хэвлэлийн төлөөлөгч бөгөөд Ерөнхийлөгчийн Тамгын газрын Хэвлэл мэдээллийн албаны дарга Ө.Золбаяр МАН-ын нарийн бичгийн даргаар томилогдсонтойгоо холбогдуулан ажлаа хүлээлгэн өгсөн. Уг албан тушаалд мөн томилгоо хийх шаардлага үүсээд байна.
УИХ
Монголбанкны ерөнхийлөгчийн албан тушаалд УИХ-ын дарга нэр дэвшүүлэн парламентаар хэлэлцүүлж, зургаан жилийн хугацаагаар томилдог. Төв банкны ерөнхийлөгч Б.Лхагвасүрэнгийн бүрэн эрхийн хугацаа энэ сарын 27-нд дуусаж байгаа юм. Үүнтэй холбогдуулан УИХ-ын дарга Н.Учрал Монголбанкны ерөнхийлөгчид "Эрдэнэс Монгол" компанийн захирал С.Наранцогтыг нэр дэвшүүлсэн. Түүний энэхүү саналыг МАН-ын Удирдах зөвлөл дэмжээд байгаа юм. Тиймээс УИХ энэ долоо хоногт Монголбанкны Ерөнхийлөгчийн томилгоог хэлэлцэх бололтой.
Мөн УИХ-ын Төсвийн байнгын хорооны дарга Х.Ганхуягийг Шадар сайдаар томилсноор тус Байнгын хорооны даргыг шинээр томилох шаардлагатай болсон. Одоогоор Төсвийн байнгын хорооны даргын үүргийг УИХ-ын гишүүн Д.Үүрийнтуяа түр хариуцаж байгаа бөгөөд түүнийг жинхэлнэ гэсэн яриа гарч эхэллээ.
УИХ-ын ерөнхий нарийн бичгийн дарга Д.Баасандоржийг чөлөөлж, түүний оронд Засгийн газрын Хяналт хэрэгжүүлэх газрын дарга Б.Батцэцэгийг томилохоор болжээ.
Засгийн газар
УИХ-ын дарга бөгөөд МАН-ын дарга Н.Учрал өчигдөр Удирдах зөвлөлийн хуралдаа Монголбанкны ерөнхийлөгчид С.Наранцогтыг нэр дэвшүүлж байгаагаа танилцуулснаас гадна хоёр сайдын томилгоог танилцуулжээ. Хүнс, хөдөө аж ахуй, хөнгөн үйлдвэрийн сайд Ж.Энхбаярыг өөрийнхөө хуучин албан тушаал буюу Шадар сайд бөгөөд Эдийн засаг, хөгжлийн сайдад нэр дэвшүүлсэн. Мөн УИХ-ын гишүүн М.Бадамсүрэнг Хүнс, хөдөө аж ахуй, хөнгөн үйлдвэрийн сайдад нэр дэвшүүлээд байна. Сайд нарын томилгоог энэ долоо хоногт УИХ-д танилцуулж, тангараг өгүүлэх бололтой.
Мөн Засгийн газрын Хяналт хэрэгжүүлэх газрын дарга Б.Батцэцэгийг УИХ-ын ерөнхий нарийн бичгийн даргаар томилсон тохиолдолд тус газрын даргыг шинээр томилох шаардлага үүснэ.
