УИХ-ын Төсвийн байнгын хорооны хуралдаанаар Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төслүүдийг хэлэлцэж байна. Энэ үеэр Сангийн яамны Төсвийн бодлого, төлөвлөлтийн газрын дарга М.Санжаадорж 2026 оны төсвийн гүйцэтгэлийн талаар мэдээлэл өглөө.
Тэрээр "2026 оны эхний дөрвөн сарын төсвийн гүйцэтгэл өчигдөр гарсан. Төсөв 1.4 их наядын алдагдалтай явж байна.
Төсвийн орлого тасалдахад гурван зүйл өндөр хувиар нөлөөлж байна. Энэ бол нүүрсний үнэ, нүүрсний хэмжээ. Гурав дахь нь импорт.
Нүүрсний үнэ өнгөрсөн оны сүүлд 64 ам.доллар байсан бол одоо 65 байгаа. Бид 2026 оны төсөвтөө 70 ам.доллар байна гэж тооцсон. Харин экспортолсон нүүрсний хэмжээ бидний тооцоолсноос их байгаа. Одоогийн байдлаар 42 сая тонн нүүрс экспортлоод байна. Энэ байдлаараа оны эцэст 100 сая тоннд хүрнэ.
Импорт өмнөх жилийнхээ хэмжээнд явж байгаа. Гэхдээ одоо бүтээн байгуулалтын улирал эхэлж байгаатай холбоотойгоор импорт нэмэгдэнэ.
Жилд орж ирэх төсвийн орлогын 28 хувь нь орж ирсэн. Үүнийг өмнөх таван жилийн энэ үетэй харьцуулахад нэг хувиар дутуу яваа үзүүлэлт. Тэгэхээр орлого талдаа асуудалгүй. Харин зарлага хүндрэл үүсгэж байгаа. Цалин, тэтгэвэр тэтгэмж, халамж бол зохицуулалт хийх боломжгүй зарлага.
Ирэх долоодугаар сард төсвийн алдагдал буурч 800 тэрбум болох байх гэж төсөөлж байна" гэв.
