Нийгмийн сүлжээгээр өдөөгдсөн, цахим орчинд түгсэн, заримдаа аюултай сорилтууд зарим өсвөр үеийнхний анхаарлыг татсаар байна.
Их Британи болон Ирландад шинэ, аюултай тренд гарч иржээ. Энэ нь ихэвчлэн залуу эрэгтэйчүүдээс бүрдсэн бүлэг хүмүүс “буруу урсгалаар жолоодох” гэж нэрлэгдсэн үйлдлээ дүрс бичлэг болгон авч, дараа нь цахим орчинд нийтэлдэг явдал юм.
Их Британи болон Ирландад гол замууд дээр автомашиныг эсрэг урсгалд буюу буруу чиглэлд жолоодсонтой холбоотой хэд хэдэн хүн нас барсан осол гарсны дараа Их Британийн Засгийн газар даваа гарагт аюултай жолоодлогыг сайшаан харуулсан дүрс бичлэгүүдийг устгахыг нийгмийн сүлжээний компаниудад уриалжээ.
Үүний улмаас цахим орчинд эрсдэлтэй жолоодлогыг харуулсан, олноор түгсэн дүрс бичлэгүүд тархаж байгаа тухай мэдээллүүдийн дунд технологийн компаниудын үйл ажиллагаанд анхаарал хандуулах болсон байна. Орон нутгийн албан тушаалтнууд нийгмийн сүлжээн дэх “лайк”-ыг гэмгүй хүмүүсийн аюулгүй байдлаас дээгүүрт тавьж байна хэмээн анхааруулжээ.
Сүүлийн үеийн ослуудын яг ямар шалтгаанаар гарсныг эрх баригчид шалгаж байна.
Амралтын өдрүүдэд болсон нэгэн ослын үеэр Английн хойд хэсгийн Мидлсбро хотын ойролцоо хоёр цагдаагийн алба хаагч болон таван залуу амиа алджээ. Тухайн үед буруу урсгалаар явж байсан автомашин тэмдэглэгээтэй цагдаагийн машинтай мөргөлдсөн байна.
Цагдаагийн мэдээлснээр, Volkswagen Passat автомашинд зорчиж явсан таван хүн 17-23 насныхан байжээ.
BBC-ийн мэдээлснээр, ослоор амиа алдсан өсвөр насныхны нэгнийх нь гэж үзэж буй, одоо устгагдсан TikTok хаягт 2025 оны гуравдугаар сард нийтэлсэн нэгэн бичлэг байсан бөгөөд уг бичлэгт тэрбээр өөр дөрвөн залуугийн хамт цагдаагийн автомашинд хөөгдөж буй мэт харагдах үйл явдалд оролцож байгаа нь дүрслэгдсэн байна.
Мөн BBC-ийн мэдээлснээр, тухайн хаягаар нийтлэгдсэн өөр нэг бичлэгт цагт 100 миль буюу ойролцоогоор 160 км/цаг гэсэн хурд заасан хурд хэмжигчийг харуулсан бололтой.
Амиа алдсан хоёр цагдаагийн алба хаагчийн зоригийг үнэлж, тэдэнд хүндэтгэл үзүүлсэн мэдэгдлүүд удалгүй гарчээ. Тэднийг 37 настай Мэттью Блейдс, 38 настай Том Клаф гэж нэрлэсэн байна.
Цагдаагийн байгууллага даваа гарагийн орой осол гарахаас өмнө болсон гэмт хэргийн шинжтэй үйл ажиллагаатай холбоотой мөрдөн шалгах ажиллагааныхаа хүрээнд 12 хүнийг баривчилсан гэж мэдэгджээ.
Цагдаагийн мэдээлснээр, хоёр автомашиныг аюултайгаар жолоодсон гэх хэд хэдэн мэдээлэл ирсний нэг нь “барилга байгууламж, эд хөрөнгө рүү автомашинаараа мөргөж байсан” гэх мэдээлэл юм.
Технологийн компаниудад өгсөн анхааруулга
Даваа гарагт Их Британийн Батлан хамгаалахын сайд Люк Поллард нийгмийн сүлжээний компаниудыг автомашиныг “замын буруу талд” жолоодож буй зэрэг эрсдэлтэй жолоодлогыг харуулсан контентыг устгахыг уриалжээ.
Поллард BBC-д ярихдаа “Нийгмийн сүлжээний платформууд дээр хүмүүс аюултай жолоодлогыг сайшааж, зам дээр зохисгүй жолоодож, замын буруу талд явж, туйлын зохисгүй авирлаж байгаагаа харуулсан маш олон контент байна. Бид Засгийн газрын зүгээс эдгээр компаниудтай аль хэдийн ярилцаж, Онлайн аюулгүй байдлын тухай хуульд олгогдсон эрх мэдлээ ашиглан аюултай контентыг устгуулах болно гэдгийг хэлсэн” гэж хэлсэн байна.
Түүний дурдсан уг хууль нь технологийн компаниудыг хэрэглэгчдийг хууль бус болон хор хөнөөлтэй контентоос хамгаалахыг үүрэг болгосон Их Британийн хууль юм.
Их Британийн Ерөнхий сайд Энди Бёрнхэм дараа нь аюултай жолоодлогыг алдаршуулсан дүрс бичлэгийг бусадтай хуваалцаж байгаа хүмүүсийг “үнэхээр жигшүүртэй үйлдэл хийж байна” гэж мэдэгджээ.
Сүүлийн ослын хариуд нийгмийн сүлжээний томоохон платформ TikTok уг хэрэгтэй холбоотой цахим орчин дахь аливаа контентыг анхааралтай хянаж байгаа, компанийн дүрэм зөрчсөн дүрс бичлэг болон хаягуудыг устгаж байна гэж мэдэгдэв.
Facebook болон Instagram-ийг эзэмшдэг Meta компанийн цахим хуудаст “өндөр эрсдэлтэй, цахим орчинд түгсэн сорилтуудыг” сурталчилсан контентыг устгадаг гэжээ.
Мөн амь насанд аюултай гэмтэл, үхэлд хүргэж болзошгүй болчимгүй жолоодлогыг дүрсэлсэн зураг, бичлэгийг 18-аас доош насны хэрэглэгчдэд хязгаарладаг бөгөөд үүнд зохиомол болон мэргэжлийн орчинд нийтэлсэн контент хамаарахгүй гэж Meta мэдээлсэн байна.
TikTok-ийн мэдээлснээр, тус компани хүчирхийллийг алдаршуулсан эсвэл гэмт хэрэг үйлдэхийг дэмжсэн контентыг хүний модератор, илрүүлэх технологи болон хэрэглэгчдийн мэдээлэх систем зэрэг олон төрлийн арга ашиглан устгадаг байна.
