Украин улс Оросыг дайны зардлаар нь сөхрүүлэх стратеги боловсруулсан ч нефтийн үнийн өсөлт болон АНУ-ын бодлогын өөрчлөлтөөс болж энэ төлөвлөгөө доголдож байна.

Украины тооцоолсноор Орос сар бүр 35 000–37 000 цэрэг элсүүлж чаддаг. Иймээс сард 50 000 орчим цэргийг устгавал Оросын санхүүгийн тогтвортой байдалд ноцтой цохилт өгнө гэж үзэж байв.

ОХУ-ын Ерөнхийлөгч Владимир Путиний засгийн газар дайнд амь үрэгдсэн цэргүүдийн ар гэрт 165 000 ам.долларын нөхөн олговор олгодог. Сард ойролцоогоор 35000 хүн амь үрэгдэж байгааг тооцвол энэ нь 5.7 тэрбум ам.долларын зардал болно.

Үүн дээр шинэ цэргүүдийг элсүүлэхэд олгодог 24 000 ам.долларын урамшууллыг нэмбэл нийт зардал сар бүр 6.6 тэрбум ам.долларт хүрч байна. Украины зорилго нь хүн хүчээр биш, эдийн засгийн хувьд дайныг даах боломжгүй болгох байв.

Гэвч нефтийн үнэ өсч, АНУ-ын Ерөнхийлөгч асан Дональд Трамп Оросын нефтийн салбарт тавьсан зарим хоригийг сулруулснаар Москва их хэмжээний нэмэлт орлого олж эхэлжээ.

Израил, АНУ Иранд цэргийн ажиллагаа явуулснаас хойш Орос нефтийн орлогоос нэмэлтээр 6–10 тэрбум ам.доллар олсон нь дайны зардлыг бүрэн нөхөх хэмжээнд хүрсэн байна.

Украины Ерөнхийлөгч Володимир Зеленський энэ талаар анхааруулж, Ойрхи Дорнодын нөхцөл байдал АНУ-ын анхаарлыг татаж, Украинд нийлүүлэх агаарын хамгаалалтын систем буурах эрсдэлтэй гэж мэдэгдсэн. Мөн түүний санал болгосон дроны мэргэжилтнүүдийг Ойрх Дорнодод ашиглах саналаас Трамп татгалзсан байна.

Европын удирдагчид болон Украины улс төрчид энэ бодлогыг шүүмжилж байна. Украины парламентын гадаад харилцааны хорооны дарга Олександр Морезко “Энэ бол алуурчинд илүү их сум өгч байгаатай адил” гэж мэдэгджээ.

Одоогоор Украин фронтын шугамд бага хэмжээгээр ахиц гаргаж байгаа ч стратегиа дахин тооцоолох шаардлагатай болсон байна.