Ус, цаг уур, орчны судалгаа, мэдээллийн хүрээлэнгийн Хиймэл оюун ухаан, тоон загварчлалын судалгааны хэлтсээс 2026 оны есдүгээр сараас арваннэгдүгээр сар хүртэлх цаг агаарын урьдчилсан төлөвийг танилцууллаа. Урьдчилсан төлөвийг сар бүрийн 28-ны өдөр шинэчлэн гаргадаг уламжлалтай.
Ирэх намрын саруудад баруун аймгуудын ихэнх нутгаар харьцангуй дулаан, хур тунадас багатай байх төлөвтэй байгаа бол төв болон зүүн бүсийн зарим нутгаар сэрүүсэж, хур тунадас ахиу орох төлөв ажиглагдаж байна.
2026 оны 9–11 дүгээр саруудын цаг агаарын урьдчилсан төлөв
Есдүгээр сар:
Агаарын дундаж температур Баян–Өлгий, Увс, Завхан, Хөвсгөл, Архангай, Булганы нутаг, Ховд, Говь–Алтай, Баянхонгорын хойд, Сэлэнгэ, Төв аймгийн баруун хэсгээр олон жилийн дунджаас дулаан, Дорноговийн нутаг, Дорнод, Сүхбаатарын ихэнх, Өмнөговийн зүүн хэсгээр олон жилийн дунджаас хүйтэн, бусад нутгаар дунджийн орчим байх төлөвтэй байна.
Аравдугаар сар:
Агаарын дундаж температур Хэнтий, Дорнод, Сүхбаатарын нутаг, Сэлэнгэ, Төв аймгийн зүүн хэсгээр олон жилийн дундаж орчим, бусад нутгаар дунджаас дулаан байх төлөвтэй байна.
Арваннэгдүгээр сар:
Агаарын дундаж температур Баян–Өлгийн нутаг, Ховд, Говь–Алтайн ихэнх, Баянхонгорын өмнөд, Өмнөговийн баруун хэсгээр олон жилийн дунджаас дулаан, Сэлэнгэ, Төв, Хэнтий, Дорнодын нутаг, Сүхбаатарын ихэнх, Булганы зүүн хэсгээр олон жилийн дунджаас хүйтэн, бусад нутгаар дунджийн орчим байх төлөвтэй байна.
Хур тунадасны хувьд ес, арваннэгдүгээр сард төв болон говийн зүүн хэсэг, мөн зүүн аймгуудын нутгаар олон жилийн дунджаас ахиу орох төлөвтэй байна. Харин баруун бүсийн ихэнх нутгаар намрын турш харьцангуй хур тунадас багатай байх төлөв гарчээ.
Иймд намрын эхэн болон сүүлээр төв, зүүн бүсийн зарим нутгаар нойтон цас орж, цочир хүйтрэх магадлалтай байгаа тул иргэд, малчид, тариаланчид болон аж ахуйн нэгжүүд өвөлжилтийн бэлтгэлээ эртнээс хангахыг мэргэжлийн байгууллагаас зөвлөв.
