Сүүлийн өдрүүдэд Богдхан уулын дархан цаазат газарт бамбай хоншоорт могой ажиглагдах болсон тул аялагч, иргэдийг сонор сэрэмжтэй байхыг Нийгмийн эрүүл мэндийн үндэсний төвөөс анхаарууллаа.

Бамбай хоншоорт могой нь хортой могойн төрөлд багтах бөгөөд биеийн ерөнхий зүс нь хул шарга юм уу хар хүрэн, нуруу ба сүүлний дагуу хөндлөн цагаан судалтай. Мөн сүүл нь богино бөгөөд хүүхэн хараа нь босоо, нүд хамрын сүвний хооронд гүнзгий хонхортой тул зэрвэс ажиглахад хамрын дөрвөн сүвтэй мэт байдгаараа бусад могойноос ялгаатай. 

Бамбай хоншоорт могойноос сэргийлэх арга:

• Өндөр түрийтэй гутал, зузаан өмд өмсөх

• Газрын ойролцоо гараа шургуулж шалгахгүй байх (модны нүх, чулууны доогуур)

• Ургамал ихтэй, харагдах орчин муу газар анхааралтай алхах

Аялал, амралтын үеэр:

• Гадаа хоноглох бол майхныг газар дээр сайн шалгаж байршуулах

• Хоол, хогны үлдэгдэл, үнэрт зүйлс могойг татаж болзошгүй

• Гутал, хувцсаа өмсөхөөс өмнө шалгах (дотор нь орсон байх магадлалтай)

Могойтой таарсан тохиолдолд:

•  Огт хүрч болохгүй

• Аль болох чимээгүй холдох

• Могойг цочоох, уурлуулах үйлдэл хийхгүй байх

Хазуулсан тохиолдолд авах арга хэмжээ

• Шархыг сорох, зүсэх, (туршиж соруулах) – аюултай

• Хазсан хэсгийг чанга боох – цусны эргэлт боогдож, эд үхжилт үүснэ

• Архи, согтууруулах ундаа уух – цусны эргэлтийг түргэсгэж, хор тархахад хүргэнэ

• Хэт хөдөлгөөн хийх – хорыг цусанд хурдан тархаана

Зөв арга хэмжээ:

• Тайвшрах – айж сандарвал зүрхний цохилт түргэсэж, хор хурдан тархана.

• Хазуулсан мөчийг хөдөлгөхгүй байлгах – аль болох хөдөлгөөн хязгаарлах.

• Хазсан хэсгийг доогуур байрлуулах – зүрхний түвшнээс доогуур байлгавал хор тархалт удааширна.

•  Нэн даруй эмнэлэгт хандах – эмнэлэгт антидот (эсрэг хор) тариулах шаардлагатай.

• Шархыг цэвэрхэн боох – боолтыг сул байлгах, цусны эргэлт таслахгүй байх.

Эмнэлэгт очих хүртэл анхаарах зүйл:

•  Хазсан цагийг тэмдэглэх

•  Хазуулсан хүний нэр, нас, шинж тэмдгийг хэлэх

•  Ямар могойд хазуулсныг мэдэж байвал тайлбарлах (боломжтой бол зураг авах)

Хэрэв бамбай хоншоорт могойд хатгуулсан тохиолдолд хамгийн ойрын эмнэлэгт яаралтай хандаж, могойтой таарсан бол Богдхан уулын дархан цаазат газрын Хамгаалалтын захиргааны 7707-0840 дугаарт холбогдохыг зөвлөв.