АНУ-ын Майами хотын "GEMS" кино наадам өнөөдөр жүжигчин, найруулагч Жесси Айзенбергийн "The Debut" киногоор нээлтээ хийнэ. Тус кинонд Жулианна Мур, Пол Жиаматти, Хэлли Бэйли, Бернадетт Питерс нар тоглосон бөгөөд Айзенберг зохиолыг нь бичиж, найруулснаас гадна хөгжмийн зохиол, дууны үг дээр ч хамтран оролцжээ.
Киноны гол дүр Мона Фридман хэмээх энгийн амьдралтай нэгэн эмэгтэй хувийн жижигхэн театрын жүжигт өчүүхэн дүр авах боловч удалгүй дүрдээ хэт автаж, жүжгийн найруулагчтай уран бүтээлийн маргаан өрнүүлдэг. Тус бүтээл нь хошигнол, хөгжим, жүжигчний ур чадварын тухай өгүүлэх уг бүтээл театрын тайзны ард өрнөдөг өрсөлдөөн, уран бүтээлчийн хүсэл тэмүүллийг харуулна.
Аравдугаар сарын 29-нөөс арваннэгдүгээр сарын 5 хүртэл үргэлжлэх Майамигийн кино наадамд олон улсын кино, шинэ найруулагчдын бүтээлүүд болон нэртэй жүжигчдийн оролцоотой тусгай үзвэрүүд багтжээ. Наадмын хөтөлбөрт "La Bola Negra" киноны найруулагчид болон жүжигчин Жон Туртурро зэрэг уран бүтээлчдийг тусгай шагналаар өргөмжлөхөөр төлөвлөсөн байна.
