Урин дулааны улирал эхэлсэнтэй холбоотойгоор суррон, скүүтер, мопедын хэрэглээ нэмэгдэж, замбараагүй хөдөлгөөн, осол аваарын эрсдэл өсөх хандлагатай байна. Иймд Монгол Улсын Замын хөдөлгөөний дүрэм, Нийслэлийн Засаг даргын захирамжийн хүрээнд зөрчил, ослыг бууруулах чиглэлээр шат дараатай арга хэмжээг авч эхэлжээ.
Энэ хүрээнд явган хүний замаар скүүтер, мопед зорчихыг хориглох зохицуулалтыг хэрэгжүүлж байгаа аж. Учир нь дээрх төрлийн тээврийн хэрэгслийн улмаас осол гарч, жолооч өөрөө гэмтэхээс гадна бусдыг бэртээх тохиолдол эрс нэмэгдсэн байна.
Иймд эхний ээлжид Их тойруу, Бага тойруу орчмын 86 байршилд 185 алба хаагч, олон нийтийн цагдааг ажиллуулж, “Нөлөөлье, чөлөөлье” аяны хүрээнд хяналт тавин ажиллаж байгаа аж.
Гэвч зарим скүүтер, мопедтой иргэд олон нийтийн цагдаагийн шаардлагыг үл ойшоох, эсэргүүцэх, уурлах зэрэг хүндрэл гарч байгаа талаар Замын хөдөлгөөний удирдлагын төвөөс мэдээллээ.
