БНХАУ-ын томоохон боомтын хот Тяньжиньд Ази, Европ, Ойрхи Дорнодын улс орнуудын төрийн тэргүүнүүд цуглаад байна. Евразийн улс төр, эдийн засаг, олон улсын аюулгүй байдлыг хангаж хамгаалах зорилготойгоор 2001 онд үүсгэн байгуулагдсан Шанхайн Хамтын ажиллагааны байгууллагын төрийн тэргүүн нарын зөвлөлийн дээд хэмжээний уулзалт өчигдөр Тяньжиньд эхэллээ.

Тус байгууллагын төрийн тэргүүн нарын зөвлөлийн 25 дахь удаагийн дээд хэмжээний уулзалт БНХАУ энэ жил даргалан зохион байгуулж байна. Энэ удаагийн уулзалт нь Хятадын зохион байгуулж байгаа тав дахь төдийгүй ШХАБ-ын түүхэн дэх хамгийн өргөн хүрээг хамарсан том хэмжээний уулзалт болж буйгаараа онцлог байна. Тяньжиний дээд хэмжээний уулзалтад оролцохоор 20 гаруй орны төрийн тэргүүнүүд иржээ.

Дээд хэмжээний уулзалт хоёр хоног үргэлжлээд өнөөдөр өндөрлөнө. ШХАБ өдгөө Хятад, Казакстан, Киргизстан, Орос, Тажикикстан, Узбекстан, Энэтхэг, Пакистан, Иран, Беларусь гэсэн 10 гишүүн оронтой. Мөн 10 гаруй орон ажиглагч болоод харилцааны түншийн статустай байдаг. Монгол улс ШХАБ-ын ажиглагч орон бөгөөд Ерөнхийлөгч У. Хүрэлсүх тэргүүн хатагтайн хамтаар Тяньжиньд айлчилж дээд хэмжээний уулзалтад оролцож байна.

ОХУ-ын Ерөнхийлөгч Владимир Путин, Энэтхэгийн Ерөнхий сайд Нарендра Моди, Беларусийн Ерөнхийлөгч Александер Лукашенко, НҮБ-ын Ерөнхий нарийн бичгийн дарга Антонио Гутерреш зэрэг анхаарал татсан зочид БНХАУ-д иржээ.

Энэ лхагва гарагт Хятадын нийслэл Бээжин дэх Тяньаньминий талбайд Дэлхийн хоёрдугаар дайн дууссаны 80 жилийн ойн баярын цэргийн жагсаал болно. Энэ жагсаалд БНХАУ ихээхэн ач холбогдол өгч байгаа юм. Хятадад уригдсан төрийн тэргүүнүүд баярын жагсаалыг үзэж сонирхоно.

ШХАБ-ын төрийн тэргүүн нарын зөвлөлийн дээд хэмжээний уулзалтыг зохион байгуулж байгаа Тяньжинь боомтын хот нь 13 сая гаруй оршин суугчтай. Дээд хэмжээний уулзалттай холбогдуулан хотын төвд такси үйлчилгээ болон машин түрээсийн үйлчилгээг түр хугацаанд зогсоожээ.