Төсвийн тогтвортой байдлын зөвлөлөөс 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулаx хуулийн төсөлд өгсөн дүгнэлтээ танилцуулав.
Юун түрүүн Дотоодын нийт бүтээгдэхүүнд эзлэх төсвийн зарлагын хувь хэмжээг бууруулж байгаа нь бодлогын зөв сонголт гэж үзжээ. 2018 онд төсвийн нийт зарлага ДНБий 29 хувьтай тэнцэж байсан бол 2024 онд 38.3 хувь болж даруй 9.3 нэгжээр өссөн. Засгийн газраас өргөн барьсан төсөлд үүнийг дунд хугацаанд 28.6 хувь болгож, Ковид-19 цар тахлын өмнөх түвшинд хүргэхээр төлөвлөсөн нь ТТБЗ-ийн байр суурьтай нийцэж байна. Цаашид ДНБ-д эзлэх нийгмийн халамжийн зардлыг бууруулах чиглэлд анхаарах шаардлагатай байна.
Хуулийн төсөлд нүүрсний тэнцвэржүүлсэн үнийг 2026 онд 133.7 ам.доллар байхаар, харин зах зээлийн үнийг 70 ам.доллар байхаар тооцжээ.
Төсвийн тогтвортой байдлын зөвлөлөөс Монгол Улсын 2026 оны төсвийн төслийн талаар "Төсвийн бодлого, хууль эрх зүйн орчныг тогтвортой байлгах, урсгал зардлын өсөлтийг хязгаарлах, хөрөнгө оруулалтын төслүүдийг эдийн засгийн ашигт үндэслэн эрэмбэлэх, хөрөнгө оруулалтын төлөвлөлтийн чанарыг сайжруулах, уул уурхайн бус салбарын татварын орлогыг нэмэгдүүлэх, татварын бодлогын шинэчлэлийг шат дараатай хийх, татварын бааз суурийг өргөтгөх, өрийн тогтвортой байдлыг хангах урт хугацааны бодлого боловсруулах, төсөв ба бодлого хоорондын уялдааг сайжруулж, олон нийтийн оролцоог бодитой болгох" гэсэн дүгнэлт, зөвлөмжийг гаргасан байна.
Тус зөвлөлөөс мөн "2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай" хуулийн төсөлд "Төсөв, эдийн засгийн бодлого нь олон нийтэд ойлгомжтой, урт хугацаанд тогтвортой, хариуцлагатай байх ёстойг дахин сануулж, төсвийн сахилга бат, эдийн засгийн тогтвортой байдлыг сайжруулах чиглэлд цаашид үргэлжлүүлэн ажиллах болно. Дунд хугацааны төсвийн тухай мэдэгдэл (ДХТХМ) нь төсвийг дагаж өөрчлөгддөг байсныг хязгаарлах хуулийн зохицуулалт 2025 оноос мөрдөгдөж эхэлсэн ч төсвийн бодлогын алдаа, гадаад эдийн засгийн орчны нөхцөл байдлаас шалтгаалан энэ жилийн ДХТХМ-д дахин өөрчлөлт оруулж байна. Энэ байдлыг цаашид давтахгүй байх нь төсвийн тогтвортой байдал хадгалагдах, эрсдэл буурахад эергээр нөлөөлнө" гэсэн байр суурийг илэрхийлсэн байна.
