Хүндийг өргөлтийн насанд хүрэгчдийн Азийн аварга шалгаруулах тэмцээн Энэтхэгийн Гандинагар хотод боллоо. Энэ удаагийн тэмцээнд 28 орны 250 гаруй тамирчин өрсөлдөж ирэх намар болох Азийн наадмын өмнөх сорилтыг хийлээ. Тус тэмцээнд үндэсний шигшээ багийн дасгалжуулагч Ч.Мартын удирдлагад эмэгтэйчүүдийн 63 кг-д олон улсын хэмжээний мастер Б.Хонгорзул, +86 кг-д дэд мастер Г.Чинболор, эрэгтэйчүүдийн 79 кг-д спортын мастер И.Амарсанаа, 88 кг-д У.Мөнхбаяр нар өрсөлдсөн байна. Манай тамирчдаас Г.Чинболор, Б.Хонгорзул нар хамгийн өндөр амжилт буюу зургаадугаар байр эзэллээ. 63 кг-д Б.Хонгорзул нийбэл дүнгээр 206 кг-ыг өргөж тивийн шилдгүүдийн өрсөлдөөнд амжилтаа ахиулсан байна.
Харин эрэгтэйчүүдээс 94 кг-д үндэсний шигшээ баг, “Алдар” спорт хороо, 30-р сургуулийн сурагч тамирчин, спортын мастер У.Мөнхбаяр огцмоор 123, түлхэлттэйгээр 151, нийлбэрээр 274 кг-ыг өргөжээ. Мөн “Алдар” спорт хорооны тамирчин, спортын мастер И.Амарсанаа нийлбэрээр 246 кг-ыг өргөж, X байр эзэлсэн байна.
Монголын хүндийг өргөлтийн холбооноос өнгөрсөн хоёрдугаар сард шигшээ багаа шинээр бүрдүүлсэн бөгөөд шинэ бүрэлдэхүүнтэй шигшээ баг анхны олон улсын тэмцээндээ оролцлоо.
