Сүүлийн жилүүдэд Үндэсний их баяр наадам бүрээр гадаадын хүндтэй зочинтой байх болсон. Энэ жилийн хувьд Ерөнхийлөгч У.Хүрэлсүхийн урилгаар БНСУ-ын Ерөнхийлөгч И Жэ Мён, гэргий Ким Хе Гёны хамт долоодугаар сарын 9-11-нд Монгол Улсад төрийн айлчлал хийнэ. Энэ айлчлал нь БНСУ-ын Төрийн тэргүүн 2011 онд манай улсад айлчилснаас хойш 15 жилийн дараа хийж буй айлчлал юм.
Айлчлалын хүрээнд Ерөнхийлөгч У.Хүрэлсүх, И Жэ Мён нар албан ёсны хэлэлцээ хийж, “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах болон олон улс, бүс нутгийн тавцан дахь хамтын ажиллагаа зэрэг чиглэлээр санал солилцоно.
Айлчлалын үеэр талууд харилцаа, хамтын ажиллагааг өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөж байна. Тухайлбал, айлчлалын үеэр хоёр тал жолооны үнэмлэхээ харилцан хүлээн зөвшөөрөх хэлэлцээрт гарын үсэг зурна.
БНСУ-ын Ерөнхийлөгч И Жэ Мён, гэргий Ким Хе Гён нар Үндэсний их баяр наадмын нээлтийн ёслолд хүндэт зочдын хувиар оролцоно.
Хоёр улс 2006 онд “Сайн хөршийн, найрамдал, хамтын ажиллагааны түншлэл”, 2011 онд “Иж бүрэн түншлэл”, 2021 онд “Стратегийн түншлэл”-ийн харилцаа тогтоосон.
Монгол Улс, БНСУ 1990 оны гуравдугаар сарын 26-нд дипломат харилцаа тогтоосон юм. БНСУ 1990 онд Улаанбаатар хотноо, манай улс 1991 онд Сөүл хотноо Элчин сайдын яамаа нээж байлаа.
