Канадын Ерөнхий сайд Марк Карни 2019 онд байгуулагдсан цагаасаа хойш хангалттай үр дүнтэй ажиллаж чадаагүй гэж үзэн Канадын компаниудын гадаад дахь үйл ажиллагаатай холбоотой хүний эрхийн зөрчлийг шалгадаг хяналтын байгууллагыг татан буулгахаар болжээ.
Энэ шийдвэр нь АНУ-ын Ерөнхийлөгч Дональд Трампын засаг захиргаа Канадыг албадан хөдөлмөрийн эсрэг хангалтгүй арга хэмжээ авч байна хэмээн шүүмжилж буй үетэй зэрэгцэж байгаа юм.
Канадын Хариуцлагатай бизнесийн асуудал эрхэлсэн омбудсмен буюу CORE байгууллагыг Ерөнхий сайд асан Жастин Трудогийн засгийн газар байгуулж байсан юм. Уг байгууллага нь албадан хөдөлмөр зэрэг хүний эрхийн зөрчлийг шалгах үүрэгтэй байв.
Тухайн үед анхаарлын төвд голчлон Хятад улс Уйгар үндэстнийг албадан хөдөлмөр эрхлүүлдэг гэх асуудал байсан юм. Хүний эрхийн байгууллагууд олон жилийн турш ийм мэдээлэл гаргаж ирсэн ч Хятадын засгийн газар орчин үеийн боолчлол ашигладаг гэх буруутгалыг няцаасаар иржээ.
Зургаан жилийн хугацаанд CORE ердөө таван албан ёсны мөрдөн шалгалт эхлүүлсэн байна. Үүнд АНУ-ын хувцас үйлдвэрлэгч Ralph Lauren, Nike, Levi Strauss & Co. болон уул уурхайн GobiMin, Dynasty Gold Corp. компаниуд багтжээ.
Бараг бүх тохиолдолд Хятадын Шиньжиан бүс нутгийн зүүн хойд хэсэгт албадан хөдөлмөр ашигласан гэх асуудалтай холбоотой байсан байна.
Мөн Hugo Boss компанийн эсрэг Уйгар ажилчдыг албадан хөдөлмөр эрхлүүлсэн гэх гомдол гарсны дараа CORE зуучлалын механизмаа ашиглаж байжээ. Гэвч тус байгууллага зөвхөн хоёр компанид албан ёсны зөвлөмж гаргасан байна.
Төсвийн хэмнэлтийн бодлогын хүрээнд Карни холбооны засгийн газрын янз бүрийн байгууллагын үйл ажиллагааг дахин үнэлж, үр ашиггүй зарцуулалтыг танахаа мэдэгдсэн.
Тэрээр “Засгийн газрын үүргийн нэг хэсэг нь аливаа байгууллага үр дүнтэй ажиллаж байгаа эсэхийг үнэлж, сайжруулах явдал юм” гэж хэлээд уг албан тушаалыг цомхотгох шийдвэрийг хэдэн сарын өмнө гаргасан гэжээ.
Карни Канад албадан хөдөлмөртэй тэмцэх хууль эрх зүйн зохицуулалттай ч тэдгээрийг хэрэгжүүлэх тал дээр хангалттай үр дүн гаргаж чадаагүй гэдгийг хүлээн зөвшөөрсөн байна.
Холбооны зарим сайд CORE-ийг хүний эрхийн зөрчилтэй тэмцэх Канадын чухал механизмын нэг гэж үзсээр байна.
Сангийн сайд Франциас Филипп Шампань энэ хавар Хятадад хийсэн худалдааны айлчлалын үеэр ирээдүйд Канадад худалдаалагдах хятадын автомашинууд албадан хөдөлмөр ашиглан үйлдвэрлэгдсэн эсэхийг хянах нэг хамгаалалтын хэрэгсэл нь CORE гэдгийг онцолж байв. Харин бусад хууль тогтоогчид уг байгууллагыг татан буулгах биш, харин илүү эрх мэдэл, нөөцөөр хангах ёстой гэж үзэж байна.
Либерал нам өнгөрсөн баасан гарагт шинэ хууль боловсруулж байгаагаа зарласан. Уг хууль нь тодорхой бүс нутгуудаас гаралтай, албадан хөдөлмөртэй холбоотой бүтээгдэхүүний олон нийтэд нээлттэй жагсаалт гаргах, мөн импортлогчдоос тухайн бүтээгдэхүүн боолчлолын шинжтэй хөдөлмөрөөр үйлдвэрлэгдээгүй гэдгийг нотлохыг шаардах юм.
Энэ алхам нь АНУ Канад болон өөр 80 гаруй улсыг нийлүүлэлтийн сүлжээнд албадан хөдөлмөр ашиглахтай хангалттай тэмцэхгүй байна гэж шүүмжилсний дараа гарч байна.
Цагаан ордон саяхан албадан хөдөлмөрөөр үйлдвэрлэсэн бараанд тавих хяналт сул байна гэж үзэн Канадын бараанд тариф ногдуулах болсноо мэдэгдсэн.
Харин Канадын Либерал намын засгийн газар шинэ хууль тогтоомж нь Трампын засаг захиргаанаас гаргасан эдгээр шүүмжлэлийг шийдвэрлэхэд тусална гэж үзэж байна.
