Өнөөдрөөс эхлэн гурван хоног цасан болон шороон шуурганы аюулт үзэгдэл болох талаар ЦУОШГ-аас сэрэмжлүүлэн мэдээлэл хийлээ.

ЦУОШГ-ын Урьдчилан мэдээлэх хэлтсийн дарга Л.Оюунжаргал" 2026 оны дөрөвдүгээр сарын 17-19-ний өдрүүдэд ихэнх нутгийг хамарсан онц хүчтэй салхи, цасан болон шороон шуурга шуурч, гамшигт үзэгдэл ажиглагдах төлөвтэй байна. Мөн агаарын температур өмнөх хоногоос 10-20 градусаар эрс хүйтрэх аюултай.

Тодруулбал, 17-18-нд шилжих шөнө Увсын өмнөд, Ховд, Говь-Алтайн хойд хэсгээр салхи секундэд 18-20 метр, зарим үед 24 метрийг давж, хүчтэй салхи, шороон шуурганы аюултай үзэгдэл болох төлөвтэй байна.

Харин 18-ны өдөр Завхан, Хөвсгөл, Архангай, Булган, Орхон, Сэлэнгэ, Дархан, Төв аймгийн нутгаар нойтон цас, цас орж, цасан шуурганы аюултай үзэгдэл ажиглагдана. Мөн Говь-Алтай, Баянхонгор, Өвөрхангай, Дундговь, Өмнөговийн нутгаар салхи секундэд 24-28 метр, зарим үед 34 метрийг давж, хүчтэй салхи, шороон шуурганы гамшигт үзэгдэл үүсэх төлөвтэй байна.

Мөн 18-наас 19-нд шилжих шөнө Төв, Сэлэнгэ, Хэнтий, Дорнодын нутгаар нойтон цас, цас орж, цасан шуурганы аюултай болон гамшигт үзэгдэл ажиглагдана. Түүнчлэн Өмнөговийн зүүн хэсэг, Говьсүмбэр, Дундговь, Дорноговийн нутгаар, 19-ний өдөр Дорноговийн зүүн хэсэг, Хэнтий, Дорнод, Сүхбаатарын нутгаар хүчтэй салхи, цасан болон шороон шуурганы аюултай болон гамшигт үзэгдэл ажиглагдана.

Иймээс малчид иргэд та бүхнийг болзошгүй эрсдэлээс сэрэмжтэй байж, хол замд зорчихгүй байхыг зөвлөе. Энэхүү үзэгдэл нь өнгөрсөн 2021 онд ажиглагдаж байсан гамшигт үзэгдэлтэй маш төстэй байгаа учир энэ үеэр иргэд малчид маань маш болгоомжтой байж, хол замд гарахгүй байхыг онцгойлон анхааруулж байна" гэлээ.