XX зууны Францын уран зохиолын хамгийн өвөрмөц төлөөлөгчдийн нэг Антуан де Сент-Экзюпери энэ өдөр төржээ. Тэрээр хүний амьдралын утга учир, нөхөрлөл, хариуцлага, ганцаардал, итгэл найдварын тухай энгийн хэр нь гүн ухаанч хэлээр өгүүлдэг байв.
Түүний зохиолуудад томоохон үйл явдал өрнөхөөс илүүтэй хүний дотоод ертөнц аажмаар нээгддэг. Аюултай нислэг, эзгүй цөл, ододтой тэнгэр зэрэг бодит орон зай нь хүний сэтгэлийн ертөнцийн зүйрлэл болж, уншигчийг амьдралын үнэт зүйлсийн талаар эргэцүүлэхэд хүргэнэ.
LE PETIT PRINCE
Дэлхийн хамгийн алдартай туужуудын нэг болох энэ бүтээл хүүхдэд зориулсан үлгэр биш билээ. Харин насанд хүрсэн хүний хамгийн эмзэг асуултуудыг хөндөнө. Жижиг гарагаас аялсан бяцхан ханхүү янз бүрийн хүмүүсийн ертөнцөөр дамжин өнгөрөхдөө эрх мэдэл, бардамнал, шунал, ганцаардал зэрэг хүний мөн чанарыг энгийн дүрүүдээр илэрхийлдэг.
Зохиолын хамгийн том үнэ цэн нь аливаа үнэнийг тайлбарлахаас илүү мэдрүүлэхэд оршино. “Зүрхээрээ л зөв харж чадна” гэх санаа бүтээлийг зангидаж, хайр, нөхөрлөл, хариуцлага гэдэг хүний амьдралын хамгийн чухал үнэт зүйл болохыг сануулдаг. Бяцхан ханхүү бол хүүхдийн ном гэхээс илүү хүн насан туршдаа ахин дахин унших гүн ухааны бүтээл юм.
COURRIER SUD
Экзюперигийн анхны томоохон романуудын нэг болох уг бүтээлд агаарын шуудан тээвэрлэгч нисгэгчийн амьдрал, хайр дурлал, үүрэг хариуцлагын зөрчлийг дүрсэлдэг. Гол дүрийн Бернис хайртай бүсгүйдээ очихыг хүсэвч өөрийн сонгосон зам, үүргээсээ ухарч чаддаггүй.
Зохиолд нислэг бол баатарлаг үйл явдал биш харин хувь хүний дотоод сонголтын бэлгэдэл болж хувирдаг. Экзюпери хүний эрх чөлөө гэдэг дур зоргоороо амьдрах бус өөрийн сонгосон хариуцлагыг үүрэх чадвар болохыг харуулжээ.
VOL DE NUIT
Өмнөд Америкийн шөнийн шуудангийн нислэгийг өгүүлэх энэ роман Экзюперигийн хамгийн хүчирхэг бүтээлүүдийн нэгэнд тооцогддог. Шуурга, харанхуй, үхлийн аюулыг сөрөн нисэх нисгэгчдийн хувь заяагаар дамжуулан мөн л өөрийн үүргийг хүн хэрхэн биелүүлдэг тухай өгүүлнэ.
Зохиолын төвд баатарлаг ялалт бус зарчим ба хүнлэг чанарын зөрчил оршино. Хатуу шаардлага тавьдаг удирдагч Ривьерийн дүрээр дамжуулан хувь хүний амьдрал болон нийтлэг зорилгын үнэ цэнийг харьцуулдаг.
TERRE DES HOMMES
Энэ бүтээл нь роман гэхээс илүү дурсамж, эсээ, философийн эргэцүүллийг нэгтгэсэн өвөрмөц бүтээл. Экзюпери өөрийн нислэгийн туршлага, осол, цөлд төөрсөн мөчүүдээ хүний оршихуйн тухай бодролтой холбон бичжээ.
Тэрээр хүн байгальтай тэмцдэг бус харин түүний дунд өөрийн үнэ цэнийг олдог гэж үздэг. Хүнд хэцүү нөхцөлд л хүний жинхэнэ мөн чанар илэрдэг гэх санаа бүтээлийн турш үргэлжилнэ.
CITADELLE
Уг бүтээл зохиолчийг нас барсны дараа хэвлэгджээ. Тодорхой үйл явдал өрнөхөөс илүү үл мэдэгдэх хааны бясалгал, сургааль, эргэцүүллээс бүрддэг. Төр, соёл, хайр, хөдөлмөр, эрх чөлөө зэрэг олон сэдвийг хүний оршихуйн мөн чанартай холбон авч үзнэ.
Энд Экзюпери аливаа соёл иргэншил гаднах байгууламжаар бус хүний дотоод сахилга бат, хариуцлага дээр тогтдог гэх санааг дэвшүүлдэг. Түүний өмнөх бүх зохиолд тархсан философийн бодролууд уг бүтээлд нэгэн бүхэл ертөнц болон зангилагдсан байдаг. Уншихад хялбар бус уг номыг Экзюперигийн сэтгэлгээний оргил бүтээл хэмээн судлаачид үнэлдэг.
