Баянзүрхийн товчоо, Улаанбаатар-Налайх чиглэлийн авто замаас баруун аймаг руу салдаг Аюулгүйн тойрог хүртэл зургаан эгнээ, 32 километр урт үргэлжлэх Туулын хурдны замын төсөл иргэдийн эсэргүүцэлтэй тулгараад байгаа. Өнөөдөр УИХ-ын Байгаль орчин, хүнс, хөдөө аж ахуйн байнгын хорооны хурлаар “Туулын хурдны зам” төслийн байгаль орчинд үзүүлэх нөлөөлөл, эдийн засгийн үр ашиг, төсөвт өртөг, санхүүжилтийн талаар Байгаль орчин, уур амьсгалын өөрчлөлтийн сайд болон Нийслэлийн Засаг дарга бөгөөд Улаанбаатар хотын захирагчийн мэдээлэл сонсохоор төлөвлөжээ.

Нийслэлийн зүгээс Туулын хурдны зам ашиглалтад орсноор Улаанбаатар хотын замын түгжрэлийг 50 хувиар бууруулна гэж мэдэгдсэн. Харин Усны нөөцийн зөвлөл Туул гол дээгүүр баригдах 7.2 км урт гүүрийн барилга байгууламжаас үүсэх бохирдлын эрсдэл, усны чанарт үзүүлэх нөлөөллийн талаар тодорхой судалгаа, тооцоолол хийж танилцуулахыг шаардаад буй.