НАСА-ийн Артемис хөтөлбөрийн хүрээнд сар руу нисч буй сансрын нисэгчид Дэлхийтэй 40 минутын турш бүрэн холбоогүй болох үеийг туулах гэж байна.
Сансрын хөлөг сарны ард орох үед радио болон лазер холбоо тасарч, нисэгчид бүрэн тусгаарлагдах юм.
Нисэгч Виктор Гловер энэ мөчийг “хүн төрөлхтөн эв нэгдлээ илэрхийлэх боломж” хэмээн тодорхойлж, дэлхий нийтээс сайн сайхныг хүсэхийг уриалжээ.
Ийм нөхцөл байдал өмнө нь 1969 оны Apollo 11 саран дээр газардах үеэр тохиолдож байсан. Тухайн үед Майкл Коллинс сарны тойрог замд ганцаараа байхдаа 48 минут холбоогүй байжээ. Тэрээр энэ туршлагаа “бүрэн тусгаарлагдсан ч айдасгүй, харин тайван мэдрэмж төрүүлсэн” хэмээн дурссан байдаг.
Одоогоор Английн Goonhilly Earth Station станц сансрын хөлгийн дохиог хянаж байгаа бөгөөд холбоо тасрах мөч нь инженерүүдийн хувьд хамгийн эмзэг үе юм.
Нисэгчид өнөөдөр орой сарны ар талд ормогц сансар огторгуйн нам гүм орчинд, бүрэн тусгаарлагдсан байдалд аялна. Нислэгийн үеэр холбоо тогтоож байсан Хьюстон дахь удирдлагын төвийн тасралтгүй харилцаа ийнхүү түр хугацаанд зогсох бөгөөд энэ нь багийнхны хувьд сэтгэлзүйн онцгой сорилт болдог.
Дэлхий дээр энэ хугацаа нь инженерүүдийн хувьд хамгийн түгшүүртэй үе байх юм. Английн Goonhilly Earth Station станц сансрын хөлгийн дохиог хянаж, байршлыг тогтоон НАСА-д мэдээлэл дамжуулж байна. Цаашид Европын сансрын агентлаг сарны орчимд хиймэл дагуулын сүлжээ байгуулах “Moonlight” төслийг хэрэгжүүлснээр ийм холбооны тасалдал арилна гэж үзэж байна. Ингэснээр ирээдүйн сарны судалгаа, суурин байгуулах ажилд тасралтгүй холбоо чухал үүрэг гүйцэтгэнэ.
Холбоо сэргэх мөчид нисэгчид Сарны ажиглалт, судалгааны үр дүнгээ Дэлхий рүү дамжуулж, хүн төрөлхтөн тэдний аяллын гайхамшгийг хамтдаа хуваалцах боломжтой болно.
