БНАСАУ болон Беларусь улс “суурь ач холбогдолтой” хамтын ажиллагааны гэрээ байгууллаа. Беларусийн ерөнхийлөгч Александр Лукашенко Пёньян хотод айлчилж буй бөгөөд шинжээчдийн үзэж байгаагаар Умард Солонгос Орос, Беларустай улам ойртон нягтарч буйг илтгэж байна.
Умард Солонгосын удирдагч Ким Жон Ун болон Лукашенко нар пүрэв гарагт Пёньян хотод шинэ хамтын ажиллагааны гэрээнд гарын үсэг зурсан бөгөөд Минск үүнийг хоёр улсын харилцааны “шинэ шат”-ын эхлэл гэж тодорхойлжээ.
Энэхүү гэрээ нь Лукашенкогийн Умард Солонгост хийж буй анхны айлчлалын үеэр байгуулагдсан байна. Хоёр өдрийн айлчлал лхагва гарагт Ким Ил Суны нэрэмжит талбайд болсон төрийн ёслолоор эхэлсэн талаар хоёр улсын төрийн хэвлэлүүд мэдээлжээ.
Пёньян Оросын Украинд явуулж буй дайнд дэмжлэг үзүүлэх зорилгоор хэдэн мянган цэрэг, их бууны сум, пуужин, пуужингийн систем нийлүүлсэн. Үүний хариуд санхүүгийн тусламж, цэргийн технологи, хүнс, эрчим хүчний хангамж авч байгаа нь Хятадаас хамааралтай байдлыг бууруулахад нөлөөлж байгаа гэж үзэж байна.
Беларус нь Москвагийн стратегийн холбоотон бөгөөд өөрийн нутаг дэвсгэрт Оросын цэрэг, пуужин, мөн Украинд ашиглах зорилготой нисгэгчгүй онгоцуудыг байршуулдаг.
БНСУ-ын Нэгдлийн яамны мэдээлснээр, Ким болон Лукашенко нарын хэлэлцээний гол сэдэв эдийн засгийн хамтын ажиллагаа байсан ч энэ айлчлал нь Пёньяны Беларус болон Оростой харилцаагаа бэхжүүлэх өргөн хүрээний бодлогын нэг хэсэг гэж үзэж байна.
Пёньян болон Минск аль аль нь өрнөдийн өргөн хүрээний хориг арга хэмжээнд хамрагдсан орнууд юм. Умард Солонгос нь цөмийн зэвсэг, пуужингийн хөтөлбөр болон Оросын дайнд дэмжлэг үзүүлж буйтай холбоотой хоригт өртсөн бол Беларус нь Украин дахь мөргөлдөөнд оролцсон, мөн 2020 оны маргаантай сонгуулийн дараах эсэргүүцлийг дарах арга хэмжээнээс шалтгаалан хоригт орсон байна.
Хоёр улс 1992 онд дипломат харилцаа тогтоож, гурван жилийн дараа худалдаа, эдийн засгийн хамтын ажиллагааны хамтарсан хороо байгуулсан бөгөөд уг хороог өнгөрсөн онд дахин идэвхжүүлжээ. Умард Солонгос Беларуст ЭСЯ-тай боловч Беларусь Пёньянд ЭСЯ-гүй байна.
Лукашенко хэлэхдээ “Манай хоёр улсын найрсаг харилцаа Зөвлөлтийн үеэс эхтэй бөгөөд хэзээ ч тасалдаж байгаагүй. Өнөөдөр бид иж бүрэн хөгжлийн үр дүнд шинэ шат руу шилжиж байна. Хожуу ч гэсэн шинэ шатанд орж байна” гэжээ.
Харин Ким Жон Ун шинээр байгуулсан гэрээг ирээдүйн харилцааны суурь болно хэмээн тодорхойлсон байна. Тэрээр “Энэхүү төр хоорондын шинэ гэрээ нь хоёр талын харилцааны тогтвортой хөгжлийг баталгаажуулах хууль эрх зүйн үндэс болно” гэж мэдэгдсэн байна.
Лукашенко энэхүү баримт бичгийг “суурь” гэж тодорхойлж, “хоёр улсын харилцан ажиллагааны зорилго, зарчмыг тодорхой ил тод тусгаж, цаашдын харилцан ашигтай үйл явцыг хэрэгжүүлэх институцийн хүрээг тогтоож байна” гэж онцолжээ.
Беларусийн талын мэдээлснээр, уг айлчлал нь хамтын сонирхлын гол чиглэлүүд болон хэрэгжүүлэх боломжтой төслүүдийг тодорхойлох зорилготой байсан бөгөөд боловсрол, соёл, спорт зэрэг салбарыг хамарсан ойролцоогоор 10 гаруй нэмэлт хэлэлцээр байгуулагдах төлөвтэй байна.
Айлчлалын эхний өдөр ёслолын арга хэмжээнүүд зонхилжээ. Умард Солонгосын төрийн мэдээллийн агентлагийн мэдээлснээр, Ким Жон Ун Лукашенког “баяртайгаар” угтан авч, 21 удаагийн их бууны ёслол, цэргийн хүндэтгэл, төрийн далбаа намируулсан иргэдийн оролцоотойгоор хүндэтгэл үзүүлсэн байна.
Лукашенко цэргийн хүндэт харуулыг шалгаж, Умард Солонгосын цэргүүдийн жагсаалын үзүүлбэрийг хамтдаа үзжээ.
Түүнийг дагалдан Гадаад харилцаа, Эрүүл мэнд, Боловсрол, Үйлдвэрлэлийн сайд нар болон Шадар сайд Юри Шулейко зэрэг төлөөлөгчид явсан байна.
Беларусийн ерөнхийлөгч мөн Кумсусаны Нарны өргөөнд зочилж, Умард Солонгосын өмнөх удирдагчид болох Ким Ил Сун болон Ким Жон Ил нарын бунханд цэцэг өргөжээ. Мөн ОХУ-ын ерөнхийлөгч Владимир Путинаас илгээсэн цэцгийн баглааг өргөсөн байна.
Дараа нь Лукашенко Ким Жон Унтай хамт Liberation Tower-т очиж, “Солонгосыг чөлөөлөх ариун дайнд амь насаа зориулсан Зөвлөлтийн армийн дайчдын дурсгалд” хүндэтгэл үзүүлжээ.
Ким Жон Ун өнгөрсөн оны есдүгээр сард Бээжин хотод Лукашенкотой уулзаж, тус улсад айлчлах урилгыг өгсөн байна. Харин энэ сарын эхээр илгээсэн захидалдаа тэрээр “шинэ эрин үеийн шаардлагад нийцүүлэн уламжлалт найрамдал, хамтын ажиллагааны харилцааг илүү өндөр түвшинд хүргэхэд бэлэн байна” гэж мэдэгдсэн байна.
Лукашенко уг хүсэлтийн хариуд “Минск Пёньянтай улс төр, эдийн засгийн харилцаагаа бүх түвшинд идэвхтэй өргөжүүлэх сонирхолтой байгаагаа нотолж байна” гэжээ.
