БНСУ-ын алдарт BTS хамтлагийн Өмнөд Америкийн таван хотод зохион байгуулсан 14 удаагийн тоглолтод нийт 853 мянга орчим үзэгч цугларсан талаар тус хамтлагийн агентлаг мэдээлжээ.
Аялан тоглолт аравдугаар сарын 2-нд Колумбын Богота хотоос эхэлж, цааш Перугийн Лима, Чилийн Сантьяго, Аргентины Буэнос-Айрес хотуудад үргэлжилжээ. Хамтлагийн тав дахь цомог болох “ARIRANG”-аар нэрлэгдсэн тоглолтын хөтөлбөрт шинэ уран бүтээлүүдээс гадна “Fake Love”, “Idol”, “Butter”, “Dynamite” зэрэг хит дуунууд багтсан байна.
“Өмнөд Америк бол бидний хамгийн их хүсэн хүлээж байсан аялан тоглолтын чиглэлүүдийн нэг байсан. Учир нь бидэнд эндхийн шүтэн бишрэгчидтэйгээ уулзах боломж тэр бүр олддоггүй. Бидний сэтгэл маш хөдөлсөн бөгөөд та бүхний хайрыг хариулахын тулд удахгүй дахин ирэх ёстой юм байна гэж бодлоо” хэмээн BTS хамтлаг мэдэгджээ.
Энэхүү аялан тоглолт нь BTS хамтлагийн Колумб болон Аргентинд бүрэн бүрэлдэхүүнээрээ хийсэн анхны тоглолт болсон. Мөн 2013 онд дебют хийснээсээ хойш Перу улсад анх удаа тогложээ. Түүнчлэн Чилид есөн жилийн дараа, Бразилд долоон жилийн дараа эргэн тоглосон аж.
Аргентины өдөр тутмын “Ла Насьон” сонин BTS-ийг “дэлхийн хэмжээний үзэгдэл” хэмээн тодорхойлсон бол Бразилын “Bandwagon” хэвлэл тоглолтын тайзны загварт Солонгосын уламжлалт ордон, үндэсний далбаанаас сэдэвлэсэн элементүүдийг ашигласныг онцолжээ.
Тоглолтууд орон нутгийн эдийн засагт ч эерэг нөлөө үзүүлсэн байна.
Аргентины тоглолтууд зохион байгуулагдсан Буэнос-Айрес хотоос 60 орчим километрийн зайд орших Ла-Плата хотод тоглолт үзэгчдийн 96 хувь нь өөр хотоос иржээ. Тэдгээрээс 48 мянга гаруй хүн тус хотод дор хаяж нэг шөнө байрлаж, дунджаар 3.5 хоногийг тус хотод өнгөрүүлсэн байна.
Тоглолтын тасалбарын зардлыг тооцохгүйгээр үзэгчид байр, хоол хүнс, тээвэр, чөлөөт цагийн үйлчилгээнд нийт 53 тэрбум аргентин песо буюу 46 тэрбум воныг зарцуулсан гэсэн тооцоо гарчээ.
Тоглолтын үеэр Богота хот руу хийх нислэгийн захиалга өмнөх оны мөн үеэс 46.6 хувиар өссөн байна. Харин Лима хотод эхний тоглолтын дараа такси дуудлагын үйлчилгээний захиалга ердийн үеийнхээс 48 дахин нэмэгджээ.
BTS хамтлаг арваннэгдүгээр сарын 19-нд Тайванийн Гаосюн хотод тоглосноор Ази, Австрали дахь аялан тоглолтоо эхлүүлнэ. Үүний дараа Бангкок, Куала-Лумпур, Сингапур, Жакарта, Мельбурн болон Сидней хотуудад тоглохоор төлөвлөжээ.
