Долоодугаар сарын 29-ний өдрийн байдлаар Хэнтий нурууны баруун хажуугаас усжих Туул /Босгийн гүүр/ , Тэрэлж, Сөгнөгөр, Хангай нурууны араас усжих Чулуут, өврийн Байдраг зэрэг голуудын усны түвшин өмнөх өдрөөс 30-90 см нэмэгджээ.
Өнөөдрийн байдлаар Тэрэлж, Туул /Лүн/, Сөгнөгөр, Байдраг /Бууцагаан сумын Баянбүрд баг/, Хөгшин Орхон, Хархираа /Тариалан сум/, зэрэг голууд үерийн түвшинг 5-50 см давсан байдалтай хүчтэй үерлэж байна.
Маргааш буюу долоодугаар сарын 30-нд Туул гол Улаанбаатар хот орчимд усны түвшин 65 см нэмэгдэж, үерийн түвшинг даван үерлэх төлөвтэй байгаа талаар Цаг уур, орчны шинжилгээний газраас мэдээллээ.
Иймд дээрх голууд болон бусад гол мөрний сав дагуу аялж, амарч, зугаалж буй иргэдийг голын эрэг, хөвөө дагуу бууж суурьшихгүй байх, бага насны хүүхдэд тавих хараа хяналтаа сайжруулах, голын усанд орохгүй байхыг анхаарууллаа.
