Өмнөд Америкийн Чили улсын төрийн өмчит уул уурхайн компани Коделко ням гарагт Эль-Теньенте зэсийн уурхайн үйл ажиллагааг хэсэгчлэн зогсоосон байна. Тус уурхайд хөрсний нуралт болж, хоёр ажилчин амиа алдсан бол нэг ажилчин амьд үлдсэн талаар Чилийн уул уурхайн зохицуулах байгууллага SERNAGEOMIN мэдээлэв.
Тус байгууллага X нийгмийн сүлжээнд нийтэлсэн мэдэгдэлдээ, орон нутгийн цагаар 14:00 цагийн орчимд туслан гүйцэтгэгч “Aura Ingeniería SA” компанийн гурван ажилчин уурхайн өмнөд ил уурхайн хэсгийг шалгаж байх үед хөрсний нуралт болсон гэжээ. Нэг ажилчныг аварсан бол нуралтад дарагдсан нөгөө хоёр ажилчны цогцсыг хожим олсон байна.
“Уурхайн өмнөд ил уурхайн хэсгийн үйл ажиллагааг зогсооно” гэж SERNAGEOMIN мэдэгджээ.
Дэлхийн хамгийн том зэс үйлдвэрлэгчдийн нэг болох Коделко компани хожим мэдэгдэл гаргаж, амиа алдсан ажилчдын ар гэр, ойр дотнынхонд эмгэнэл илэрхийлсэн байна. Мөн ослын шалтгаан, нөхцөл байдлыг тогтооход шаардлагатай ажиллагаа явуулахаар Чилийн мөрдөн шалгах цагдаагийн байгууллага болон Улсын прокурорын газрын төлөөлөгчид хэргийн газарт ажиллаж байгааг мэдээлжээ.
Тус компанийн мэдээлснээр, Чилийн төвийн бүсэд орсон аадар борооны улмаас уурхайн ил олборлолтын хэсэгт хөрсний нуралт үүссэн аж.
“Осол болох үед тухайн бүсэд ажиллаж байсан гурван ажилчны аюулгүй байдал, сайн сайхан байдлыг хамгаалах арга хэмжээг нэн даруй авч хэрэгжүүлсэн” гэж компанийн мэдэгдэлд дурджээ.
Зуун гаруй жилийн турш үйл ажиллагаа явуулж буй Эль-Теньенте уурхай нь Андын нуруунд, Чилийн нийслэл Сантьяго хотоос зүүн өмнө зүгт 75 орчим километрийн зайд байрладаг. Тус уурхай 4500 гаруй километр урт хонгил, газар доорх малталттай.
