Нигерийн цэргийн онгоц даваа гарагт Бенин-Сити хотоос Лагос руу нисэж явахдаа баруун өмнөд нутгийн Ондо мужид осолджээ. Ослын улмаас онгоцонд байсан 25 зорчигч, багийн гишүүн бүгд амиа алдсан байна.
Нигерийн Агаарын цэргийн хүчний мягмар гарагт мэдээлсэн амь үрэгдэгсдийн тоо нь Нисэхийн сайд Фестус Кеяма даваа гарагт анх мэдээлсэн 32 хүнээс бага байв.
“NAF 931 онгоцонд багийн таван гишүүн, 20 зорчигч буюу нийт 25 хүн байсан” гэж Нигерийн Агаарын цэргийн хүчин мэдэгдэлдээ дурджээ.
Ослоос амьд үлдсэн хүн байхгүй байна.
Ерөнхийлөгч Бола Тинубу ослын шалтгааныг тогтоох мөрдөн шалгах ажиллагаа явуулахыг үүрэгдэж, үндэсний хэмжээнд гурван өдрийн гашуудал зарлажээ.
Агаарын цэргийн хүчний ATR-42 онгоц Бенин-Сити хотоос Лагос руу ердийн нислэг үйлдэж байх үедээ Гринвичийн цагаар 08:13-д агаарын хөдөлгөөний удирдлагын төвөөс холбоо тасарсан аж. Уг осол нь сүүлийн жилүүдэд Нигерид гарсан хамгийн олон хүний аминд хүрсэн агаарын ослуудын нэг болжээ.
Аврах ажиллагааны багуудыг эрэн хайх ажиллагаанд дайчилж ажиллан онгоцны сэгийг хожим далайн эргийн Ибокода хотын ойролцогоос олсон байна.
