Монголын эрүүл мэндийн ажилтаны үйлдвэрчний эвлэлийн холбоо болон эмч, эмнэлгийн ажилтануудын цалинг нэмэгдүүлэх, эмч мэргэжилтнүүдийн ажлын ачааллыг бууруулах талаар мэдээлэл хийлээ.
Тэд хэвлэлийн хурлын эмч, эмнэлгийн мэргэжилтнүүдийн хувьд бүх шатны эмнэлгүүдэд орон тооны дутагдалтай буюу нэг эмч, сувилагч 2-3 хүний ажлыг хийж байгаа асуудлыг хөндөж, төр өөрсдийн чиг үүргийн дагуу цалингийн асуудлыг судалж, шийдэх ёстойг онцоллоо.
Эмч нар өнгөрсөн аравдугаар сарын 9-ны өдөр улс орон даяар “Эрүүл мэндийн зөв шинэчлэлийн төлөө” хэмээх уриатай тайван жагсаал хийж шаардлага хүргүүлсэн бөгөөд Монгол Улсын Ерөнхий сайд Г.Занданшатар тэднийг хүлээн авч уулзсан юм. Гэвч энэ уулзалтын үеэр ажлын хэсэг гаргаж, боломж бололцоог судлах үүрэг өгчээ.
Харин уг хэвлэлийн хурлын үеэр МЭМАҮЭХ-ны дарга Ч.Нарантуяа, “Бид судлах ёстой хүмүүс биш. Бид хийсэн хөдөлмөртөө тохирсон цалин хөлсөө авах эрхтэй, шаардах ёстой болохоос бус төрийн хийх ажлыг судлаад явж байх хүмүүс биш” хэмээв.
Цааш нь МЭМАҮЭХ-ны дарга Ч.Нарантуяа,
“Эрүүл мэндийн салбар тэрбум тэрбумын төсөвтэй ч ариутгалын бээлий ч олдохгүй байна. Төрийн байгууллагын чиг үүрэгт цалин мөнгөний асуудлыг судалж, шийдэх ёстой. Бид төрийн ажлыг хийх ёсгүй. Хавар 21 хоног суулт хийхэд Тагнуулын байгууллагад биднийг дуудаж шалгасан шүү дээ. Биднийг цалингаа нэмүүлэхийн төлөө хийсэн ажлыг улс төржилт хэмээн шалгасан. Энэ бол улс төржилт биш. 2026 оны төсвийг эргүүлэн татахгүй бол дараа дараагийн арга хэмжээг авна. Биднийг суулт хийсний төлөө дарамталж байна. Эмч, ажилтнуудыг эрхээ хамгаалсны төлөө дарамталж, ажлаа хийсний төлөө хариуцлага тооцдог. Гэвч авч байгаа цалин нь энэ хариуцлагатай дүйцдэггүй. Эмч, ажилчдын цалинг 3.5 сая болгох хүртэл бид байр суурьтаа бат зогсон тэмцэх болохоо үүгээр мэдэгдэж байна” гэв.
Үүнээс гадна эмч нар эмнэлгийн үйлчилгээ үзүүлэхэд эм, эмнэлгийн хэрэгсэл хомсдолтой, ариутгалын бээлий хүртэл олдохгүй хүнд нөхцөлд ажиллаж байгааг дурдаад, уг асуудал нь зөвхөн эмч, ажилчид цалингаа нэм гэхээс илүүтэй Монгол Улсын 3 сая 500 мянга гаруй иргэдийн эрүүл мэнд хохирч, амь нас алдах эрсдэлд хүрээд байгааг мөн онцлов.
