Орон сууцны хороололд зэвсгийн агуулах ажиллуулахыг зөвшөөрсөн албан тушаалтнуудыг тогтоосон бөгөөд тэд хуулийн дагуу хариуцлага хүлээх болно гэдгийг Украины Ерөнхийлөгч Володимир Зеленський бямба гарагт мэдэгдлээ.
Энэхүү шийдвэр нь саяхан Киев мужийн Вишневе хотхонд байрлах зэвсгийн агуулах Оросын пуужингийн цохилтод өртөж, улмаар хүчтэй дэлбэрэлт үүссэний улмаас 10 хүн амь үрэгдэж, олон зуун байшин барилга сүйрсэн харамсалтай үйл явдалтай холбоотой юм.
Ерөнхийлөгч В.Зеленськийн мэдээлснээр, Украины Аюулгүй байдлын албанаас явуулсан мөрдөн шалгах ажиллагааны үр дүнд төрийн өмчит "Укроборонпром" зэвсэг үйлдвэрлэлийн нэгдлийн аль албан тушаалтнууд Вишневе хотод агуулах ашиглах зөвшөөрөл олгосныг тогтоожээ. Тэрээр буруутгагдаж буй хүмүүсийн нэрийг шууд зарлаагүй ч төрийн өмчит хоёр үйлдвэрийн удирдлага хууль болон цэргийн дээд удирдлагын шийдвэрийг зөрчиж үйл ажиллагаа явуулж байсныг дурдсан юм. Түүнчлэн уг шийдвэрийг гаргахад нөлөөлсөн байж болзошгүй бусад албан тушаалтнуудыг үргэлжлүүлэн шалгаж байгаа аж.
Вишневе хотод зэвсгийн агуулах дэлбэрсэн нь Украины нийгэмд асар их бухимдал, шүүмжлэл дагуулаад байна. Орон нутгийн оршин суугчид эрх баригчдыг хариуцлагагүй хандсан, суурьшлын бүсэд аюултай зэвсэг хадгалж байгаа талаар иргэдэд ямар ч мэдээлэл өгөөгүй хэмээн буруутгаж байгаа юм.
