АНУ-ын Ерөнхийлөгч Дональд Трампын засаг захиргаа цагаачлалын хяналтыг эрчимжүүлж буйтай холбоотойгоор тус улсын визний ярилцлагын товыг түр хугацаагаар зогсоох арга хэмжээ авчээ.
АНУ-ын Төрийн департаментын хэвлэлийн төлөөлөгч мягмар гарагт мэдэгдэхдээ, дэлхийн бүх улс дахь АНУ-ын Элчин сайдын яам, консулын газруудад зориулсан дэлхийн хэмжээний сургалтын хөтөлбөр эхлүүлсэн бөгөөд визний үйлчилгээний товыг уг сургалтад нийцүүлэн өөрчлөхөөр болсон гэжээ.
Трамп АНУ-аас албадан гаргах ажиллагааг эрчимжүүлж, цагаачлалын хяналтыг чангатгах бодлого хэрэгжүүлж байгаа. Үүнд виз болон ногоон картыг хүчингүй болгох, мөн улс төрийн үзэл бодол, АНУ-ын холбоотон Израилийн Газын зурваст явуулж буй цэргийн ажиллагааг эсэргүүцсэн Палестиныг дэмжигч жагсаалд оролцсон зэрэг олон шалтгаанаар виз, цагаачлалын хүсэлтийг татгалзах арга хэмжээ багтаж байна.
Трамп эдгээр арга хэмжээ нь АНУ-ын дотоодын аюулгүй байдлыг сайжруулах зорилготой гэж мэдэгддэг.
Гэвч уг бодлого шүүхийн саадтай мөн тулгараад буй. Баасан гарагт АНУ-ын нэгэн шүүгч Трампын засаг захиргааны 75 улсын иргэний цагаачлалын виз олголтыг түдгэлзүүлсэн бодлогыг хүчингүй болгосон байна. Шүүгч уг бодлого нь Төрийн нарийн бичгийн дарга Марко Рубиогийн хуулиар олгогдсон эрх хэмжээнээс хэтэрсэн гэж үзжээ.
Төрийн департамент сургалтын хөтөлбөрийн дэлгэрэнгүй мэдээлэл болон хэдий хугацаанд үргэлжлэх талаар тодорхой мэдээлээгүй байна. Харин уг сургалт нь АНУ-ын төрийн халамж, тэтгэмжид найдах магадлалтай гэж үзсэн виз хүсэгчдийг консулын ажилтнууд илүү сайн илрүүлэх, мөн виз хүсэгч бүрийг “иж бүрэн, тууштай байдлаар” үнэлэхэд чиглэнэ гэж мэдэгджээ.
Визний ярилцлагын товыг түр зогсоох тухай мэдээллийг Financial Times өмнө нь нийтэлсэн байна. Тус сонинд мэдээлснээр, АНУ-ын Элчин сайдын яам, консулын газруудад ярилцлагын товоо аль хэдийн авсан цагаачлалын виз хүсэгчдэд ярилцлагыг нь өөр өдөрт шилжүүлсэн тухай цахим шуудан илгээж, шинэ товыг дараа нь мэдэгдэнэ гэжээ.
Трампын цагаачлалын хяналтыг чангатгах бодлогыг хүний эрхийн байгууллагууд өргөн хүрээнд буруушааж, ялгаварлан гадуурхсан шинжтэй, үзэл бодлоо чөлөөтэй илэрхийлэх эрх, зохих хууль ёсны ажиллагааны эрхийг зөрчиж байна гэж үздэг.
Мөн хүний эрхийн байгууллагууд уг бодлого нь АНУ-д, ялангуяа арьс өнгө, угсаатны цөөнх болсон иргэдийн хувьд аюулгүй бус орчин бий болгож, арьс өнгөөр ялгаварлан гадуурхаж, үндэслэлгүйгээр сэжиглэх явдалд өртөх шалтгаан болж байна гэж мэдэгджээ.
Трамп 2024 оны сонгуулийн кампанит ажлынхаа үеэр хууль бус цагаачлалыг зогсоохоо амлаж байсан. Гэвч түүний засаг захиргаа хууль ёсны цагаачлалын нөхцөлийг ч хүндрүүлсэн. Тухайлбал зарим төрлийн хөдөлмөрийн виз хүсэгчдээс шинэ, өндөр хэмжээний хураамж авах зэрэг арга хэмжээ хэрэгжүүлжээ.
